ZIDOR MA YADA - VINTE ONE DESPÔS

Plumanhãzinha logue cidim, lá na Farnande Pau, Armanda pô frisdera na lume ta quentá cum pinguim d'óleo de mancarra, sabola ma uns puntinha de tucim bedje quel tinha comprode de vespra lá na loja de Nho Sarofe, pegode ma Nho Jon de Guida, perte de butequim de Bente, na rua de Praça Strela.

Logue que frisdera quentá e c'aquel sabola ma tucim lorá, pa depressa, el ruvrá na el tude quel catchupa quel tinha tchode quel note ta esquá colde na esquador pa guizá, expediente pa rapte quê Clemente, sê cumpanher, tava que pressa pa ba trá quel dia de traboie lá na Rebera de Vinha.

Clemente, na sê primer buquenhada, fazê um carinha margose, assim cma ses dôs
fîdje, Zidor ma Yada, pa mode Armanda, sês boa madrasta, tinha esquecide de trá quel padoce de coive de note daquel catchupa, antes de gordal na cefre.

Armanda fecá um qzinha chatiode e antes de comprendê situaçon, el cumeçá logue ta desculpá, ta dzê cma tempe tinha estode fresque quel note e cma quel cifrim de seu, que sê purtinha de dôs rede, vrode cara pa vente lá na janela d'czinha, ca tava custmá falal ametira...

Prublema é que aquel catchupa tava inzede mode quel coive que fcá na el e forteal. Ma lá ca tinha tempe de pensá dôs vez, ês tinha era que dal na corpe meme assim e sei ta bai, cada um pa sê banda, ba espiá que catá, pa trazê pa casa.

Cma tinha dode tchuva já tinha uns dia, Clemente cambá Rebera de Vinha pa ba mondá e coroá mîdje que já tava espindîde. Zidor ma Yada, inda menine, ês cambà Passaron ba gordá corve ma pardal na horta de Tia Chala ma Nho Jack, quê pra lá mîdje inda tava só ta cmeçá de somá na tchon, pa ligria de pardal ma corve!

Armanda, mode de custume, cambá morada ba ganhá sê vida, o ta carregá na Cais, o anton ta carregá ága pa casa de gente, pa pudia também garantisse quel panela na lume de tude dia. Boa madrasta, el ma Clemente ca tinha fîdje, ma sempe el cuidá dritim tonte de Clemente cma de sês dôs mucim, que sês mãe, que Deus haja, dexás.

Moda Dorre ma Yada contá, lá na sês casa, deboxe de sês pobreza, sempre ês vivê na paz e harmonia, que tude sês vezim e c'aquel morabeza de sês madrasta Armanda, que pa ês fui moda um mãe desde sês três ma quate one té sês nove ma dez one d'idade, que fui tempe de sês separaçon, mode cosa de vida...

Clemente, venenode p'amigue, naquel influência de ba pa S. Tomé, resolvê ba dá nome sem dzé Armanda nada. El tmá sé dez conte n'Agença pa ba armásse viaja, el metê na bolse pensonde cma jal tava rique, el cambá casa pa ba convencê Armanda p'ela ba dá nome também, pês pudia bá djunte...

Ma Armanda ca qris sabê nem flaça daquel bada pa S.Tomé. Bastá quel hora que Clemente tchegá lá na casa, panhode ela de surpresa, ta contal tude do que jal tinha fete, ta mostral quel denher...

Armanda vassalá, sanhá na el que nem um cadela parida, ba ta dzel p'el lembrá ma ês é qu'era cumpanher dum data d'one de vida, ma smeme assim el ca tive nium considraçon pa ela. Que lá pa rua, diasá tude gente já sabia daquel viaja menes ela, que chei de vergonha fecá fora mitida...

Dorre ma Yada, na dsencontra, ca sabia daquel drama que tava ta esperás, basta ês tinha tchegode diasá de Passaron, que barriga forte quê Tia Chala ma Nho Jack tinha ês tratode, bem tratode.

Assim, moda tude menine, ês tava lá pa rua ta brincá, ta soprá bulinha de sabon de tcheu cor, cum tubim de carrim de linha moiode na ága de sabon quês tinha fete, dente dum latinha de sardinha baziu, ta mandás pu ar pa sês ligria e de sês culiguinha...

Armanda tchorá bem tchorode pamode quel surpresa de Clemente, despôs el marrá dente na boca ta dá pa forte, somá na porta e tchemá quês menine pa casa pês bem jantá e falá ma ês, pa explicás do que tava ta passá...

E assim, fui grande tristeza pa tude quel família mode quel separaçon, sem esperá, de Clemente, q'um semana despôs tava t'imbarcá na mei daquel trupida de gente ta bai pa S. Tomé.

Zidor ma Yada fui recomendode na sés Tiu Bastion (Sebastion), que tava cuidá d'horta de Ti Manel de Matos, ma que também tava vivê de pesca lá pa Calhau. Armanda preparás sês sarron que pena, quê ela só já ca tava ta ba podê guentá que tude ês, quê já na tempe de Clemente vida tava estode bastante defícil...

Quê basta diasá jás tava estode ta vivê moda tcheu na terra, naquel cicle de catchupa (cuzenhá de note, trá quel colde pa bibé, gordá quel catchupa pa cmê guizode que cavala quonde el tava parcê, p'onziora de plumanhã daquel ote dia)...

Tiu Bastion bem de Calhau de véspra d'imbarque, bem bescá sês subrim. Anton, despôs del despedi e tmá quel truquim na sê armon Clemente, el gradecê Armanda pa tude quês one qu'ela criá quês mnine e, que pena dela, que tava ta ba fecá el só lá naquel casa de Fernande Pau, dzel que se num qualquer momente ela mestê dês, era só mandás recode.

Pé na mama de cadera, Tiu Bastion rancá a pé pa Calhau ma sês subrim e pa camin el ba ta esplicás cma vida pra lá ca tava ta ba ser moda na morada... Quê pra lá tinha qu'arguide cidim, e liger, ta espiá que catá...

Ma ca era pês tivesse mede, quel tava lá pa insenás ptá inzol na mar e trabaiá terra. E ba ta dzês: ca bsote boda, nhas menine, quê furmiga ta criá deboxe de pedra, quontamá gente!

Dvera, uns dia despôs de ter tchegode pra lá, ês cumeçá ta comprendê situaçon, quê quel papa n'era tude dia... Assim, ês tinha qu'argui cidim, ba ma sês tiu, cada um que sês caninha de pesca, ba panhá borbe n'orela de praia, entrode na ága tude nu pa ca estragás ropa, quês tava dexá n'areia deboxe de pedra lá na Ponta de Viana.

Conforme maré ma lua, às vez borbe tava cmé ô non, anton ês dôs piqnim, t'infrentá vida, sempre deboxe de cuidode de sês tiu, ês tava metê lá p'aquês pedra e lagoa, ondê que tude ês prendê nadá, ta catá lapa ma esgrovetá um polvim qu'espitchá naquês broque pês cmesse o vendeba.

Na tempe de lua escure (lua nova), ês tava cambá Praia Grande ba panhá plarde, quel carangueje bronque, bom isca de panhá sputa, morre, barber ma ruta motche, quês tava escalá, salgá pa secá e gordasse pa reserva, quê ca tinha tempe de ba vendês, quê morada tava fecás prope longe e ca tinha corre pa levás.

Quês viaja pa Praia Grande é que fecàs más gravode na memória d'infãncia, quê tiu Bastion tinha bode pa morada, lá pa Ti Manel de Matos, que tude quarta-fera tinha quês tabler de pon ma bolacha pa pobreza, assim el tava trazê raçon rindide, quês tava levá ma ês.

Basta té farinha de pau el tava moial c'açúcra pal pudia intchá e rendê pês cmé...

Assim, ês tava passá quês três dia pra lá, naquês pesquer olte de Panilinha, na mei daquel perigue daquês bufador, ondê que sês tiu tava dexí na maré seca, marrode corda, ba trá purtchave, qu'era um dinhirim rindide, quente na mon, que já tava dá uns quarta de midje a más pa casa.

Vida dure, contode pa Dorre ma Yada uns vinte one despôs, lá na sapataria e relojaria de Nho Didon, cobe chef de Monte, ma Hirmine manquim, más cunchîde pa Sporing, que pove vrá Boring o Buring...

Stora bem mode ocasion dum incontre que, moda nha Mãe, que Deus dal céu, tava dzeme sempre: fazê gente bem sem espiás na cara e nunca cmé diante de menine pa bô ca dás, quê um dia ês ta lembrá na bo.

Fui lá que Yada pliça, que fazeba sê quarta classe já home grande, quê Dorre nunca prendê a lê, rancá ta contone, na mei de tude esse Stora de Vida, quel passaja interessante de nôs incontre, que nem mim, dvera dvera, já-me tava ta lembrá...

El ruvrà na guela sê cupim daquel bom grogue que Buring passal, logue el ba ta passá sé armon Dorre el, pel pudia tmasse também, despôs el vrá pa mim, que sê cara séria, el cuntinuá:

- Ó, Izizim, bo ta lembrá quel dia na Calhau que bsot tinha bode p'um pique-nique, lá na nôs horta, ô amdjor, horta de Ti Manel de Matos, qu'inda era em vida?

Um dzel: Não! Contá?! E el sigui:

- Quel dia tinha um gzinha de vente, ma tempe tava ruglar. Anton, Dona Cujinha, amdjer de Ti Manel, bom mon de panela quel era, tinha bsote fete um calderada de matá. Nôs lá t'oiá bsote ta cmê, cum fome da gaita, sem podê dzê nada mode vergonha...

Anton, bo bai, bo intchi um travessa de pirex que tude cmida de Deus que tinha derriba daquel mesa, que três codjer, bo bem trazene que bo mizade, sem conchene, pa no cmesse...

Bo ta lembrá daquês três mucim piqnim, incocra, tude nu na mei daquel vente, perte daquel tanque d'aga, junte daquel bomba de poce lá na horta? Apôs, um daquês mucim era mi! E quel dia no marcobe, pa tude tempe de vida, quê só bo só, sem bo sabê, matone prope nôs fome, quê quel dia lá na casa ca tinha nada, nem pa dasse um pardal um lonche! Ma, cma Deus ca ta drumí, bo parcê!

Hoje, nôs tude já é home grande e cma no t'incontrá sempe li na Buring, ulim li ta contobe esse Stora de nha infância, que já nem bo ca tava ta lembrá, que marcome e tcheu, tude nha vida...

E podê creditá se bo crê, que té data d'aoje, um procurá sempre siguí bo ixemple de nunca cmê diante dum Onje de Criste (menine) pam ca dás sês parte... Quê, nh'armon, fome devra né sabe na gente grande, quontamá na menine...


Zizim Figuera (José Figueira, Júnior)

V O L T A R