CHÈMY-CADILINHA BRANCA D'LISBOA

Danguinha bà pa Portugal. Qond él bem, él trazé um cadilinha branca d'Lisboa!!! Dspos d'tont pensà e repensà, là na casa és panhà és pol nome d'Chèmy.

Basta, alviçera daqél cadilinha branca d'Lisboa corré pa tud qés rua, pert d'casa d'Danguinha, irmã d'MaréRoq, inférmera d'grand personalidad na d'Spital d'Saocent. Notod pa tud gent pa sé manéra d'trabaià, gritaènta, mà boa inférmera!!!

Naquél temp qés tava dsinfetà frida, q'catchorrinha (nitrato d'prata) basta era pol dà sei ta bà sfrià dor, infrontod là pa orèla d'mar. Mà também dà frida tàva curà dum vez!

Ora Danguinha tud bajòfa q'sé cadilinha branca d'Lisboa tàva tràtàl moda um mnin: tàva dàl bonhe, pol pò d'arroz, purfùme d'tcher da là d'lòja d'Djandjan, q'tàva na moda (Bourgeois de Paris) enfim, até péche qél tàva cmé tinha q'ser trod spim pa mode ca fri Chèmy boca!

Dia ta bai, dia ta bem, tud gent d'rua d'Fazenda, rua d'Descobriment, rua d'Cavoquim té d'Canalim d'Fogà Macòq, tàva bà passà pert daqél janela d'casa, p'adimrà quél bitche, sò pa oià ligria d'Tia Danga. Cadilinha jà bem ta crià e moda éra d'spérà, él bem sei na lua o q'era normal na cicle d'tud vida!

Anton, qés catchorr prêt d Saocent cumçà ta bà bem tchéré Chémy, grànhà na janela etc... Danguinha, tud inocent na principe, so tàva dzés: chò catchorr!!! Ess é o qé?

Mà cosa bà ta piorà, qé en véz d'um ctachorr, vrà ta parcé dèz! Era um àfronta naqél rua dia e note: ladrà, guérra d'catchorr, vzim alvoroçod, enfim um paròdia!

Danga, inrascod e chei d'vergonha. Bà na National, cumpainha d'carvon, él comprà uns varinha d'mantampa, assim tud catchorr q'tàva bem, él tàva dàs d'vàra e él tàva dzés q'raiva: li ninhum CATCHORR-PRET d'Saocent,ta po na CADILINHA BRANCA d'Lisboa!!! O Deus o càfronta!!!

Cantai, pxador d'zorra (instrumento de madeira utilizado em urgencia para transportar sacos da alfandega para as diversas lojas ou casas comerciais por meio de arrastão, deslizava bem nas calçadas, pois era dado de cebo) q'uvi qél conversa d'passàja, dzé: adéche Dona Danga, pa mode éss bitche, té bocé jà vrà racista? Bocé tmà cuidod qé bocé ca branca!!!

Qond Danga jà ca pude màs, él bà ter de Mané Semedo, q'éra grand amig d'casa e él xplicàl tud sé mal e vergonha q'jàl tinha d'pov ta mandà boca!!! Mané Semedo dzél: om catém prublema, ranjà bo Chèmy un calçinha q'imchumàç, bo ta bstil él, bo ta pol um gzinha d'gazolina là... bo toià cma dà stora ta cabà!

Assim Tia Danga fazé, e defàct catchorr tàva bem, és tàva tchéré, mà és tàva bà m'bòra! Pa mode qél tchér d'gazolina!

No dia siguinte, tud content, él bà té levà Mané Semedo um prinsintim. Maria, criadinha d'casa q'tinha sé tchùtch e q'gràça d'séi na rua, dzé: o Dona Danga, se bosé quizer, cma agora jà catem prublema, um ta fcà ta bà passeà bosé Chèmy, na praça!

Danga dzél: okay bo tem razon! Mà ca bo sqcé, cma nha mninha ca podé sei, sem sé calçinha puste gazolina! Maria respondé log:catém prublèma!!!

Naqés primer dia, tud okay, tud gent d'casa,àva content mà sempr q'cuidod!!! Cosa bà ta bài, bà ta bài até cum dia, Maria bà passeà Chèmy na praça, cma tud tàva drét, él tràl sé coléra, él tchàl à vontade. Mà o q'Maria tinha sqcid também, fui d'po Cadilinha Chèmy, sé calçinha q'gazolina!!!

Anton, um CATCHORR-PRET d'SAOCENT, bem él bàfa Chèmy, CADILINHA-BRANCA d'Lisboa!!! Chémy jà dsaparcé na fmàça! Maria jà infrontà, jàl bà pà casa dzé Dona Danga! Jàl tchgà, ta tchorà pegod chéi d'med, ta grità: o Deus o q'contrariadad, o c'àfronta...

Pov jà bem sisti Danguinha q'àga d'açùcra, qé él smàià! Tud gent d'zona tà ta spià Chémy… Danga tàva spià pa Maria, él tàva dzél: o staporinha do diab, qzé q'jà bo fazém q'nha Chemy???!!!! Es tà tchorààà!!!

Bom, li pa seis e meia d'tarde lusc q'fusc, parcé Chèmy-Cadilinha Branca d'Lisboa ta bem pégòde ta rastà pà casa, mà qél Catchorron-Prêt,d'Saoncent!

Primer q'oiàl ta bem fui Mané Semedo! Log él grità: o Danga, quàz olà Chémy ta bem?! Dvèra?! dzé Danga?! Mané Semedo, buzod moda él éra, largà t'arri él dzél: sim é ela q'certeza!!!

So é pena qé gazolina jà cabà, és tita trazéb él... a RABOQUE !!!


Zizim Figuera (José Figueira, Jùnior)

V o l t a r