CENTENARE DE MANIN ESTRELA – GRANDE ATLETA MINDLENSE

Moda voz de pove de nôs terra sempre dzê e que rason, cem one n’é cem dia! Assim, cem one justim despôs de Manin Estrela ter morride, num conversa ma nh’amigue Manuel Brito Semedo q’uns dia atrás na sê blog “Na Esquina do Tempo” tive boa ideia de homenajiá ês nôs amigue comum, fui cosa que fazem também fecá contente, sube apreciá e prometé de fazel também.

Enton mi, na cumprimente dês promessa, despôs de nôs conversa, ulim li na cuntinuidade ta completá esse homenaja merecide dês centenare, que Brito Semedo já tinha cumeçode na sê blog, de nôs grande atleta de Club Sportiv Mindlense na Soncente de Cab Verd por nome de Manin Estrela, um amigue bastante perte de nha pai Djô Figuera (José Figueira), pessoa com quem ês fazê djunte um bocode camin na vida e na desporte.

Mnine de Soncente, nascide dia 2 de Outubre de 1910 na rua de Morguine por nome de Plácido Republicano Estrela, butzode pa pove de Manin Estrela, fidje de Nh’Antone d’Ana que fui pai de tude um geraçon d’atleta moda Chete grande boxer que tive de trá teima a tcheu boxer inglês de Blackpool na tempe de carvoer, Manel de Nh’Antone d’Ana ô Manel Senhora ô Mé, grande remador, merguiador e capoera brigador cunchide de Ponta de Praia. E, pa completá familia tinha sês irmã Dminga de rua de SanBandera.

Mez pa cuincidência e cosa de vida, sel tivesse vive el tava fazê 100 (cem) one na dia de centenare de proclamaçon de républica na Portugal, dali orija de sê nome puste pa sê pai na época, de Republicano...

Nôs Manin Estrela, que sê espirte alegre na tempe de rapaz nove, tava fazel presentá dôs faceta de sê vida, um dum grande atleta desportista, moda bsote podê oial li nesse fotografia em anexe, el na mei de sês colega e também otes grande atleta que sube defendê cores daquel valente Club mas bedje de Cab Verd (incarnode e bronc) dum história sem igual nem rival que fui sempre nôs Club Sportiv Mindlense fundode pa João Serradas na 1922...

Pa mostra uli foto ta cumpanhá esse homenaja a Manin Estrela:

1 – Na foto de esquerda pa direita de pé: - Mario Morbey, Oca, Manin Estrela, Jon Doia, Alector Sena (Manin Sena) e Lela de Né (Djêzz).

2 – Foto na mei sentode de cócra de esquerda pa direita: José Figueira (Ti Djô), Adérito Sena, Licer Araújo.3 – Foto pa diante na mesme sintite, sentode na tchon: Dufega, Aires Sena e Tijim.

Manin Estrela, fui um daquês atleta bastante complete daquel época, tonte na futebol cma na cricket de tempe de Salina, ondê quel fazê grande parte de sê educaçon sportive moda tcheu malta nove daquel tempe, que despôs sube passone mensája.

Dantes quonde Mindlense inda ca tava ixisti el fui, junte ma otes daquês rapaziada de Club Imperial de nhô Toi Lulu e, moda pove ta dzê, fui de dondê quês bem tude despôs pa Mindlense, equipa quel defendê e amá tem fi de sê vida sempre c’aquel distintive na peite de Leão do Norte Atlas que nunca Mindlense trocá pa quel águia, moda Benfica queris.

Manin naquês tarde interminável de rua de Moeda ondê quel morá té morré, tava contá sempre sês peripécia de jogue e um daquês cosa que marcal fui BARON quel equipe d’inglês de carvoer, que moda el e otes tava dzê sempre, é que insenaba Mindlense ijgá na sistema “ W M”, despôs dum grande liçon de futebol que fui siguide dum cabazada...

Falá de Manin Estrela desportista, tem tcheu que dzê, ma um cosa é certe tude gente sempre sube de Manin, quel atleta “fairplay” dum correçon ixemplar na terrene de compe de jogue de futebol, cricket, golf e tem que ta dzê cma el, de boa saúde té tchegá de dá uns tacada na tenis (cosa que n’é de certeza).

Despôs que doença panhal (parilisia de dôs perna) ainda home nove, el tava bai a pé que sês dôs bingala cum força de vontade de matá, o que tava fazê admiraçon de tude gente, bá oiá jogue de Mindlense na Compe de Jogue, el só, sem ajuda de ninguém.

Morode na rua de Moeda, el fui senpre rodeode d’amigues, mnine que gente grande cunfundide, assim lá na el ca tava cabá gente... Grande amigue ma Jack Cunqueli Côque, Antonin Cunote, Silvestre ma Damonse de Mã Balica, Nhô Jon Chaline ma tude sês fidje, Belmiro Gil (pai), Jon de Guida, enfim ma tude gente daquel rua, ma Praça Estrela lá pirtim e ma gente que tava bem tude dia vesital datarde lá na sê casa.

Ma que Manin Estrela, gente tinha que tem mute cuidode na sês mufeneza, ma pirraça, quê el tava estode sempre desposte e pronte pa panhá gente na russiáda.

Mi também, moda tude otes q’era amigue del, nô ca cunsigui escapá de tmá nôs parte naquel bonc quel ta tinha lá na mei de gente, ta cuvedá pove pa sentá, c’aquel bróc na mei cum agulha de sóc guentode pa dôs linha já pronte pel ma cumpanher puxá só pa picá gente polpa... Era cada grite de surpresa que tava fazê log vezim somá na porta, pa bem espiá quem que tinha caide n’armadilha de Manin, pas podia largasse t’arri.

Enton um vez, Muchim de Faria (pliça de captania) tchegá de borde cum grande mortadela q’um despenser tinha el dode na borde. Cma el tava sem cmê, el largá log lá pa Manin. Assim quel tchegá, el mostrá Manin log quel mortadela, cmedor de fama moda el era, el ba log ta dzê Manin pa mandá pô um spaguete na lume, quê godzide quel mortadilinha tava ta ba psú nhondenga.... eheheh!!!

Manin, que sês ideia luminose de sempre, panhá quel mortdela gatchá, enton el imbruiá um pé de sapote naquel imbalaja de mortadela ta esperá Muchim p’almoçe... Ês sentá na mesa bnitim, spaguete quente fete que sauce de tomate ta esquá fume... Muchim sirvi sê bom prote de spaguete, cumpanhode pa quel bom vin Clarete de Nhô Molgode. El pedi Djodjon de Nhone, ajudante de Manin pa trazel um faca, ága já ta cumeçá ta crial na boca, el ta desimbrulhá sê mortadela.... SURPRESA!!!

Ô que chatice, ô q’abole...Chima sei na guerra ma Manin ta perguntal pa sê mortadela, jal argui té de mesa chatiode ta gritá, gente ta bem ta juntá na rua... Enton, Sr.Belmiro Gil vezim, que pensá cma era algum problema grave, abri janela de sê casa ta perguntá Manin, aquile era o quê?

Manin, traquine buzode de primer classe, c’aquel imbrulhe na mon pa mostra, vrá dzê Sr.Belmiro cma, n’era nem más nem menes que Muchim de Faria que tinha tchegode de borde que tonte fome, quel mandá fazê um spaguete pal ba cmêsse c’aquel pé de sapote!!!... Fui rise pafronta na tude quel rua!... Ma despôs quel mortadela parcê, tude cosa pô na camin e tude gente pude trá sê nóc na el junte ma Manin Estrela e Muchim de Faria.

Storia dexe li de nôs Manin Estrela tinha mil e um pa contá (moda quel bilhete de lotaria ma Pedre Tina)etc... Ma Manin pr’além de sês pirraça, também tinha bon coraçon e el da lá de sê casa tava cuidá tcheu de mnine, na jogue de futebol, tava cuidá também de tcheu daquês que ca tinha nem eira nem beira, fidje de pobreza e portante el n’era rique de dnher, ma tinha um grande riqueza espiritual na sabê partilhá ma gente e, el tava cunsigui alcançá tude...

El é que tchegá d’organizá interre de tcheu de nhas amigue d’infancia de nôs rua, moda Leisão, Lau de Brisa, Boring, Manel de Chica, Antonin Cunote, Jack Cunqueli Côque etc etc...

Ma antes de tchegal sê hora que fui na dia 10 de Agoste de 1980, na sê terra Soncente, sê distintive de Leão do Norte de Club Sportiv Mindlense que tonte el amá, moda el dzê, tinha que ser herdode p’um Midlense de gema moda el!

Enton, nh’amigue RUI DE TUDA (um Mindlense de gema) que ta vivê na Rotterdam-Hollanda de vesita na Soncente tive de ba espiá Manin Estrela e, Manin na tude sê humildade de custume, sinti cma Rui é q’era quel pessoa indicode pal dasse quel distintive, enton el tral, despôs dum data d’one de sê peite e que lágrima na oie, el passá Rui de Tuda el, que té inda, tel gordode na sê casa e, prometê dum dia fazê quel mesme geste moda MANIN ESTRELA...

Zizim Figuera (José Figueira, júnior)

V O L T A R