DEZÔITE DÔS ÔITE (1888) - SÛMETER D'SONCENTE

Log na dia q'um tchegà na Soncente, naqel mês d'Agôste calorênte d'2006, primer cosa q'um fazé, fui sigui qel ritual sagrôde d'bá bênzé nha côrpe n'àga d'mar d'nôs Laginha… Anton, uns dia despôs, q'aqel sôdade infrontôde e vontade d'ôià nha Pov ma nha terra… Cma ca podia tchà d'ser, um séi t'andà pa tude tchon d`Soncente, bá spià nhas amigue e dmirá desenvolvimênte d'nha terra, na tude sé xtênson, despôs d'tônte ône longe sem bài.

Na camin d'Montssussêgue, um incontra Tola, nha grande amigue d'infância, cumpanher daqés juguinha, dez trocada vinte cabada, q'as vêz nem ca tava cabà, traz d'Praça Strêla, Tcheqêr ma Cova d'Inglêsa, siguide daqés bônhe d'mar, trada liza d'strada pa cambota, sobretude na maré cheia.

Despôs daqel stop,ma qel braçona,d'quinze ône longe,sem ôià cumpanher,no séi t'andà. Um perguntal,ôndé q'el tàva ta bài ? El dzême,cma era pa Montssussêgue! E log, moda era nôs cstûme,el mostrame camin e nô rancà ta bài…

Ma,qônde nô tchegà, pêrte d'padaria d'Matos,tava ta passà um Intêrre q'tchéu povo.Um perguntal era qem nh'é ?

Basta,jà nô ca nem bài,pa Montssussêgue,pamôde era um filha d'Djêna d'Farnânde Pàu,gente cunchide e amigue,d'nôs dôs. Da là,no reslové cumpanhà Intêrre e assim,jâme tava proveità,pa dà qel pêzeme e vesità nôs Sûmeter "Dezôite Dôs Ôite (1888 ) ôndé q'ta cova,d'tude nhas familia (José e Maria Eugénia Monteiro Figueira,Pedro Silva e Maria Antonieta Silva Méneguin)…

E assim,fui fête !
Djêna,fecône mute ubrigada,d'nôs prisença,qé nô bá levà qél côrpe,té sumêter e despôs,nô bá fectchà intêrre,la na sé casa,moda ta mandá tradiçon e pela graça d'Deus,qel grogue ma báfa,ca faltá,pa trà qel poêra,d'sumêter.

Ma,na hora d'cumpanhà intêrre,conversa ma Tola,fui sempre nimôde,pa camin, qé jàl bà ta contâme e lembrâme,um mônzada d'Stora,d'nôs têmpe d'menine,q'té jam tinha sqeçide,daqés intêrre d'um vez,qônde Nhô Padre,tava cumpanhà môrte té Sumêter,q'aqés respônse (pagàda) dôde pa camin…q'aqél caxon,puste drriba daqés dôs bônque,lá na rua d'Côque .

Cosa q'quâz tude menine tava fazé,qônde és tava uvi qél sino n'Igreja,pa Intêrre, d'môrte murride,era ba ta côrré,pa Sacristia,ter d'Senhor Sulvêste,so p'és pudia ba besti,qés tùnica incarnôde,d'isdà cumpanhà Intêrre e ganhà qel cruzôde,num épca em q'um pôn d'mîdje,era dôs toston,mas qés cinqe toston,ranjôde na résponse, q'tava dá pa mel,pa ptá na pon mîdje…

Nô levà,quâz um hora pa tchegà na Sûmeter,qé caxon,tava ta bài,na côrre,q'tude nôs a pé,pa trâz,ta cumpanhà intêrre,té tchegà,o q'jà nñera sem têmpe,qé Sol,tava prop ta quêmà…

Um rêclamà ! Ma Tola,pôme spirte log na lugar,q'um: oh boy,éss cosa é evolução ! Jà nñé,moda qél vez,q'tava levôde caxon,pa camin,na ômbre,q'aqél sentimênte,d'familia ma amigues,ta scânçà cumpanher…

Log q'no tchegà,primer cosa,q'um nôtà,é q'fachada,ma entrada principal,d'nôs Dezôite Dôs Ôite,ca tinha mudôde,qé moda d'cstûme,tava là qel porta d'fêrre, marcôde,q'sé 1888 e qel cabiçinha d'cavera,pa indicá Sûmeter…Q'sé Nha Marquinha,primer cova,log n'entrada,na lôde squerde,là detôde,drriba d'sé cova,puste qél broçe,na cabeça.

Anton,bêmme log n'ideia,qônde um pessoa tava morré,na terra,q'Pov tava dzé : - cma,era mas um,q'tinha bôde vesità,Nha Marquinha… Absûrde,é q té hoje india,qel Cova,ta cuntinuà ta impô,ruspêite e mêde.Basta,tinha gente,sem fazé barulhe,q'té tava bà pô mon na ÉL…Superstiçon ?! Não ?!

Sûmeter,naqel silêncio,natural,sempre bem ranjadim,limpim q'sés cova,ma Igrijinha la na méi,tude branquim,num grande harmonia e ruspêite,pa nôs môrte, cosa q'sempre fazé parte,d'força d'nôs Cultura,tônte na Cab Verd,cma na Diàspora

Despôs d'ter cumpanhôde,qel filha d'nôs amiga Djena,té na sé ultma morada,mi ma nh'amigue Tola,nô proveitá d'ba vesità,cova d'nhas familia.Anton,na mei d'nôs conversa durante vesita,um perguntal,té ôndé q'nos Sûmeter,q'dantes era tão piqnim, tàva ta bái ?

Anton,el dzême,cma da lá,jàl ca tava ta ba ser xtindide,mas du q'aqel là ! Cosa cunfirmôde pa nhas primo,Manuel Silva(Catcha)ma Miguel Silva(Goff),d'sigunda vez,q'no tive là.

Tola,menine d'Soncente,traquine,fazedor d'biôgue,pirraçente pa chuchu,proveità daqel vesita,pa cumeçà log ta lembrãme e contâme,Stora e mas Stora,d'nõs Sûmeter 1888.

El dzême,cma là parriba,na tchã d'Montssussêgue,ondé q'és fazéba uns casa,derriba d'lugar,ôndé q'era,qês dôs antigue Sûmeter d'Inglês,ma Talione.Gente,q'ba morà prà là,ta passà sés vida,t'uvi barulhe ma t'ôià Gongon…Um largà t'arri !él dzême,jurôde: - ca bô arri,môçe ! Qé ess cosa é prop dvera !!!

Anton,bême na ideia,um pô ta falal d'um Stora d'séu,q'passába ma el diazà e sé amigue,q'jam tinha té sqeçide sé nome !…El vrà pa mim,q'sé boca môtcha,d'um dente só,él dzême t'arri: - jà bô tita bem,q'bôs gôze ?!

Ca bô maginà,cma um sqeçé d'bô,buzôde p'afronta,Q'bô é,e bô ca ta seqçé,lovara'Deus,ma ess lissim,jà passôbe prop pau !!! Ma,tchûme dzêbe sé nome,pa bô ca fecá préi,ta contà macaquim : - cumpâde Squêbra, q'ta na munde d'verdade e Deus dal Céu !

Nôs dôs sentôde,ta scançà,despôs d'ter andôde quâz tude Sûmeter,naqel sumbrinha daqes ârve,la pêrte d'Igreja d'Dezôite Dôs Ôite,anton mi é q'bem contàl sé sturinha, qaqel vez pa SanJon…El dode t'arri p'afronta,t'uvi me q'admiraçon,despôs d'tônte ône…Stora Stora fartura d'Céu Ame.

Ora,Senhor Tola ma sé cumpade Squêbra,era dos grande amigue,q'tava morà la na Cavôque Brumêdje(Montssussêgue)zona sò d'gente d'Mindlense,equipa d'futebol, mas antigue e popular,cunchide e d'fama,na tude tchon d'Cab Verd,pa sé Storia na vida desportiva d'nôs terra.

Naqel têmpe,Tola ma Squebra,ca tinha lugar na team,qé pa isgàba na Mindlense, bô tinha q'ser prop bon ! Assim,es era dôs grande animador e isgador,daqes juguinha d'fralda d'Mindelo ôndé q'aqés team,ta tinha,sô qés nome d'miséria.Na cartaz,dia d'jogue,es tàva pô la na parede : - Fraqueza x Dublidade ô Monque x Léjôde

Taça pa qês desafiu,era sempre un panelona d'catchupa !!! Qem ganhaba,tava cmé na mesa,qem perdêba,tava cmé na tchon !!! Ma o certe,é q'na fim,na mei d'ligria, tude criston,tava ôtcha qel bocôde d'cmida pa cmé,na base,daqel pûre mizade d'um vez,scantchim e sem merrinha…

Um ta lembrà,cma qel ône lassim,dia d'SanJon,tinha tchegôde,moda tude ône,pa ligria d'tude pov e special pa qes dôs cumpade. Anton,qes dôs amigue fixe,moda és era,largaba pa Rebêra d'Julion,log cidim,pa bàss sisti missa,d'Senhor SanJon revulteôde,moda tradiçon ta dzé,qé tude ône,tàva conteçé,cma pa festa d'Senhor SanJon,sempre tava calhá,q'um vênte,prop brôbe, pa salgà gente,ôie.

Ma,q'nunca tava,impedi Pov,mêz na méi,daqel poera ma Sol quente,prop ta quemà, d'cuntinuà,naqel Colà…Colà SanJon,desufnôde,chéi d'força,num spirte,d'não importa e tchà bai…

Sempre,q'Djê ma Capôte,q'sés navizim bnitim,bem infeitôde,t'abri festa,ta rudià igreja,cumpanhôde,p'um trupida d'tambor,pa tràz,q'pite e Pov,ta…Colà…Colà… Sanjon…ta bài,ta spancà na cumpanher,naqél cadencia e ritme,q'sobretude,sô nôs sabé fazé,porqé ô nô cré,ô no ca cré,nos tud é …TAMBOR…E el ta na sangue !!!

Tola ma Squebra,tava prop sabim,d'munde ! Es entraba,na tude qés barraca,d'lorgue d'Rebera d'Julion…Nha Camila d'Café Cantante…Hilas Miranda…Tilina…Bia d'Bar etc…Es cmé,brinhòla,fongue ma funguim,pastilim d'melagueta,midje ingron, és bibé bandôie,pôntche,grogue e tude o q'bem na rêde,qé qél dia,era dia d'festa e mâma tava prop grosse !!!

Anton,tude és dôs,prop sabim,q'sés rosare,d'papilim d'côr,ma midje ilhôde,q'mancarra trocolôde prop bnitim,passôde na pescôçe,ca tava,ta tma fé d'têmpe…D'nôte cumeçà ta fetchà ! Es ba saltà LUMENARA,la na lorgue,ôndé q'pov d'munde,tava rinquiôde,ta spêrà vez pa saltà…drriba d'sàltà…

Ma cumpade Tola,na méi d'tude qel sabura,mêdente,moda el era,cumeçà ta fecà preocupôde,qé d'nôte,tava ta bem, ta fetchà. Jal bem,dà sé cumpâde Squebra fàla,p'és bass imbora pa morada,ma Squebra dzél log: - Puxa cumpade,agora q'li tita vrà prop sabe,é q'bocé ja cré pa nô bài ?! Mi,nem gaita,qé hoje um tita fcà préi e p'um bài é so manhã !!!

Tola,fecà mûque,jal ca dzé mas nada,so el spià p'arlôje,él dà fé cma,tava ta faltà,um quarte pa MEIA NÔTE ! Smême assim,q'prà là,chéi d'pov,lugar nimôde e sabe pafronta,él ca pensà dôs vêz ! El pô pé,na mâma d'cadera,él largà pa casa,na Montssussêgue,na mei daqel scure d'matá môrte...

Cma el era spurtista,bom corrêdor,trançôde q'mêde q'jal tinha iliôde na côrpe,el rancà ta bem ta tchinqà(corré devagarim),té qônde,el entrà na strada,na méi daqel scûre d'matà…Mâs pa diante d'el,tava ta bem ôte Criston,qé cmida tive,ma denher p'és béss,naqes camiunitim(Ir e Bai)inda mâs,daqél hora,ca tinha...

Tola,jà dà Criston fala,jal gritàl: - Oh Criston,spêrome...Té q'jal panhà Criston,na currida,jas bem nimôde ta falà,sempre q'coràja,t'ôià luz,là longe,na morada ta bem ta vançà…

MEIA NOTE,inpino,és dôs ta passà na porta d'nôs Sûmeter Dezôite Dôs Ôite (1888 data d'fundaçon d'Sumter d'Soncent) ! Tola vrà pa Criston,él dzél: - OH MÔÇE,QÔNDE MI ERA MENINE,UM TINHA MÊDE D'PASSA LI…

CRISTON,vrà pa el,na méi daqel scûre,ta mostral sés dintim e dzél : - CARAMBA MÔÇE ! MI TAMBEM…MODA BÔ… MA QÔNDE MI ERA VIVE…eheheheh !!!

Tola,q'aqel mêdonha d'gongon ma cosa rum,q'el tinha,dà um grite,benzé sé côrpe,ta fazé,Pel Senal Santa-Cruz e bá ta côrré ta grità: CREIO NUM SÔ DEUS VERDADER Da na força d'currida,tchegà na casa,q'aqél d'mêde,trancôde na côrpe,mêtè porta dentre,q'folgue tmôde,sem dá fé daqel pé de carrêra q'el tinha dode…


Zizim Figuera     (José Figueira, jùnior)

V o l t a r