ÉDEN PARK: UM CINEMA PATRIMONE DE CULTURA E VIDA DUM POVE

Ambiente dentre de Cinema Éden-Park naquel tempe, ligode aquel espirte d’humor de nôs pove, era tão animode que gente podia té dzê cma era um verdader espectacle dentre dum espectacle, porque qualquer filme que tava despertá emuçon de pove el tava reagi log lá mez, sobretude naquês filme de “cowboy” em que persiguiçon de sport / bandide era na corrida de cavole, que tude quel pove tava cumpanhá ta baté que pé forte naquel tchon soalhode de madera de cinema, c’aquês grite de: Ué... ué... uéuéué....

CINEMA É ARTE E ARTE É CULTURA! UM PAÍS SEM CINEMA É UM PAÍS NA DECADENÇA DE SÊ CULTURA!!!

Toi Cicil, impregode fiel de cinema e figura cunchide de pove de Soncente desde de tempe que Nhô César Marques fundaba Éden-Park, argui log cidim na más um madrugada quente de quarta-fera junte ma sês cumpanher de rotina, Titine de Tchã de Licrim, Djosa Casaca, Ti Jack ma Saturnine de Fábrica de Limonada, betode mon na traboi.

Tal era quel obrigaçon de tude dia e de sempre na cinema Éden-Park, pa Toi ma sês colega despôs de cada filme, boxe ô tiatre, de arrumá e desinfetá quês bonque na sala que ás vez ta tinha perceveje, seja na geral, bancada, fôtel ô camarote, só pa quonde pessoal bem oiaba sês espectacle pês podia otchaba lugar limpe.

Preparaçon daquel cartaz que tava anunciá e fazê propaganda de filme era um verdader obra d’arte, que tinha grande influença na presentaçon de espectacle.

Cartaz, era um quadre fete de madera, pa Toi Cicil bom carpinter, que despôs era decorode e escrite na papel especial de côr que letra bem trabaiode tude bnitim e desenhode pa Titine. Ô enton, se Titine ca tava estode, Djosa Casaca é que tava tmá dagada de fazê também quel bom traboie na perfeiçon, pa ligria de tude quem tava passá pra lá, oiá e podia levá quel mensaja pa gente, na tude conte de tchon de Soncente, pas podia fecá ta sabê colé filme ô espectacle é que tava ta ba tem naquel tarde ô naquel note, lá na Cinema Éden-Park.

Na Praça Nova, deboxe de “Corete de Múseca” e perte de ponta de Greme, lá pa volta de quate pa cinque hora da tarde, já tava estode nôs Tuda ma sês filha Manuela ma Beta que sês tabler bem carregode de chupeta, sucrinha, barão, pom de midje e pirinha das ilha, quate pa toston, betode tude espece de espirte d’essência de fruta, comprode lá na drogaria de nôs eterne Djandjan, não sem esquecê quel mancarrinha, assim cma quês otes vendedor de drops ma toffé moda Magnífico ô Chique Drops, etc.

Enton era quel ruma de gente, mnine que gente grande trançode ta comprá tude o quês podia antes dês entrá na cinema só pas podia teba um cosa de cmê, pa ba ta cumpanhá espectacle c’amdjor goste e ligria. Despôs era quel pôr na bicha pa bá comprá bilhete, na mei daquel tchere de suor trançode c’aquel tchere daquês cabeça lustrose daquel 10 (dez) toston de vaselina betode quel 5 (cinque) toston de purfume de caniquinha, também comprode lá loja de Djandjan e que tava fazê ligria de pove!... Só que aquel tchirim tão sabe demás, ás vez té tava dogá gente e vrá ta tcherê mafe pafronta...

Quonde espectacle era bom e que bilhete ca tava tchegá pa tude gente, era log um chatice quê, na hora d’entrada na cinema, gente ca tinha hipotse de comprá quês porter de respeite moda Tiu, Ti César, Nhô Junzim e más otes, que nunca tava facilitá pove vida nem fetchá oie pa dexá gente passá de graça, quê ês n’era estragode.

Ma quel raiba de ca ter otchode bilhete, trançode c’aquel manha de crê bá oiá quel bom espectacle era tão grande, que gente ca tava podê resisti e tava sinti tentode pa ba saltá cinema. E anton tava riscode sem mede, uns pa falta de denher e otes pa desafor de corpe de ca ter podide otchá manera d’entrá legalmente.

Saltá parede de cinema n’era cosa facil, quê tinha quel gigante de Ti Jack, guarda manhose que tava pô malta tude espece de prublema e ta tremê que sês armadilha, moda el tava dzê, prop pa panhá malandre.

Ti Jack bodzê tava durmi de note ta pensá na mil e um manera de panhá malta que tava saltá parede na note de estreia de Cinema Éden-Park. Assim, el tava inventá cada cosa... El tava cortá rama d’espinhera ô cimbron, quel tava pô ta secá na bera de parede. E se gente tava defendê o escapá de espin daquês espinhera seque, más longe el ta tinha cal bronque espaiode na tchon... Assim, era escapá de espinhera, betá pé naquel cal bronque, dá fecá que pê log marcode!

Enton despôs, pa nôs Ti Jack de cinema caça era fácil e, log que filme tava cumeçá, el tava bem ta passá na mei de bonque ma cadera que sê oie de boi (lampada de pilha eléctrica) e tude gente quel tava otchá que pé suje el tava cuvedás pa saí... E tava saíde sem rafilá ô gaguejá, quê Ti Jack era daquel raça d’homona dum cone só que tava pô tude gente respeite.

Basta pa pirraça pove tava custumá contá cma el era primer’es prime irmon ma Nhô Faustino de Maderal, quel home más forte de Soncente, que um vez ba incontrá ma sê cumpade e amigue Manel d’Antonha, home más forte de SanAnton, na Porte Nove, ondê que tude one era cena daquel aposta de dá quel “monzada” pertode té quonde reiá, pa midi força e oiá quem que era más forte! Cosa que fecá na Stora daquês dôs prime daquês dôs Ilha irmon!

Tude quel pove rinquiode de volta pa ba sisti quel “monzada de valente”… Ês tchegá, ês salvá cumpanher na respeite, ês dá quel “monzada” ta bai ta pertá cumpanher mon, cosa que durá quaz um hora, tude’s dôs muque, suor ta dexis pa cara aboxe sempre c’oie na cumpanher sem reiá nem mexê! Ma dzide cma na fim, despôs de tonte esforce, um pupu, ote chichi!... Agô, quole dês?! Nunca pove sube quê fui gordode segrede pa respeite daquês dôs home!...

Conte vai atrás pa nô podê cuntinuá stora:

Enton, na cinema Éden Park, antes de filme ô espectacle cumeçá, log quês tava abri porta pa pove entrá, cma tchon era soalhode de madera, era um barulhada de pove ta pesá quel tchon, quê tude gente tava corrê pa podia otchaba melhor lugar quês pudesse!... Pessoal um vez bem instalode na sês bonque ô cadera, era um descascar e cmer nervose de mancarra, que casca betode lá pa tchon, num critche, critche, de pesá quês casca pa quês gente que tava tchegá atrasode na sala.

Tude ês cosa pa desgraça de Toi Cicil ma sês cumpanher, que tinha tude vez de dexá sala limpe pamode espectacle de note, o que tava leval a impregá sempre quês amdjer expediente pa rapte,pa raforce, já cunchide pa bons barredera de cinema.

Antes de cada filme cumeçá, ta tinha sempre quês desenhe animode moda Tom & Jerry ô Hackle & Jack, Donald Duck e otes más, siguide daquês documentare de Actualidades e Movietone, ora na inglês, ora na português de Brasil, notícia mute apreciode de pove...

Despôs tava bem sempre “tralha” daquel filme que tava ta ba ser passode num ote dia, o que também tava fazê delirá de ligria tude quel pove. Enton ta tinha más um pausa e despôs quel filme tava podê cumeçá! Nhas gente, mil e um filme nô oiá naquel Cinema Éden-Park, sem contá tude quês otes espectacle, Tiatre, Boxe, Boi de Carnaval, etc...etc... Cosa que sempre fazê parte de nôs educaçon e de nôs cultura!

Ambiente dentre de Cinema Éden-Park naquel tempe, ligode aquel espirte d’humor de nôs pove, era tão animode que gente podia té dzê cma era um verdader espectacle dentre dum espectacle, porque qualquer filme que tava despertá emuçon de pove el tava reagi log lá mez, sobretude naquês filme de “cowboy” em que persiguiçon de sport / bandide era na corrida de cavole, que tude quel pove tava cumpanhá ta baté que pé forte naquel tchon soalhode de madera de cinema, c’aquês grite de:

Ué... ué... uéuéué....

E pove na época tinha sês herói na filme de cowboy moda Tom Tiller, Randolph Scott, Gary Cooper, James Stewart, Kirk Douglas, Burt Lencaster, John Wayne, Roy Rogers que sê cavole Triger e mutes otes más. Manifestaçon de pove tava tingi sê ponte máxime era quonde ta tinha quês cena de soque na fim, em que tude gente tava fecá de pé ta gritá quel:

- Boa… boa… dal el… dal el…

Basta ta tinha gente que tava embalá, levantá, rancá ta bai pa écran que pove tinha que dás fala e mandás sentá... E, quel barulhada era tão grande que, quonde note era calme sem vente na ilha, tava uvide quês grite pa quaz tude banda de Mindelo e fralda!

E assim fui vida de nôs pove de Soncente na época, que vivê sempre ligode naquel linha directa de sês “Grande Cinema Éden-Park” e sês influência cultural graças a Nhô César Marques, sês irmon e tude quel pessoal operador moda Djindjon de Melo (pai), despôs Tuta Melo (fidje), influência esse que despôs era levode pa otes ilha de nôs Cab Verd. Quê quem que tava vivê na Ilha que ca tinha cinema e que um dia tava bem pa Soncente tava oiá e despos tava levá quel alvícera pa sê ilha, o que era bem natural!

Sem nium duveda Éden-Park fui um Grande Centre Cultural de Soncente e porque não de Cab Verd, ondê que tava desinrolá tude espece de actividade: Filme, Tiatre, Boxe, Boi de Carnaval, etc, etc, e que nôs tude daquel geraçon sem excepçon fui autor e actor, quê nos tude contribuí voluntaria ô involuntariamente pa mantel VIVE!!!

Pa concluson, um Grande Homenaja pa tude aquês Home ma Amdjer, desde más grande té más piqnim, que dá sês best, desde fundaçon de Éden Park na 1922 pa Nho César Silva Marques, Julim Oliveira, Alfredo Marques e fidje, que sube cuntinual e mantel VIVE, o que nôs tude ta devê sempre reconhecê que gratidão! Homenaja também pa tude quel pessoal de manutençon, moda Toi Cicil, Ti Jack de cinema, Ti Cesar, Tiu, Nhô Junzim, Titine de Tchã de Licrim, Saturnine, Djosa Casaca, Nhô Totoi de Matiota mecánique que tava manté quel motor prop de Cinema, ma tude quês Barredera de valor e más otes que ca tita beme grinhassim na nha mimória.

E bsote podê creditá cma influença d’Éden Park na vida Cultural de nôs terra ma nôs Pove ta fecá gravode pa eternidade na nôs mimória ma nôs coraçon, pamode quel passar de mensaja que té data de hoje no pude passá nôs Nove Geraçon, pas podê fecá ta sabê cma:

ÉDEN-PARK, vindide ô comprode, lá fetchode ô aberte, ta cuntinuá ta fazê sempre parte de nôs Patrimone Cultural Nacional, sim! E desse manera li, um t’otchá cma nô ca devê esquecel e, moda Bana ta cantá naquel morna, ta dzê:

- CA NÔ DEXÁ NUNCA MORRÊ CULTURA DE NÔS TERRA!...

Zizim Figuera (José Figueira, Júnior)

V O L V E R