XATISSE MA TRISTEZA D'UM EMIGRANTE VERDIANO

Bilêla ma Terênçe d'Rosa d'Cônhe, dôs prime rmon, proveitàba aqés trinta dia d'féria daqél ône làssim, moda d'cstûme, despôs d'um ône d'trabôie, na duro, na stranger pa bàss incontrâba e passàss qés dia djûnte, na sés terra, ma familia e amigues pa matàss qél sôdade q'tude criol q'ta vivé fora ta sinti d'sé terra.

Cma têmpe tàva ta bà saìs d'pôque, qé trinta dia nñ'é nada, qônde ta contôde q'viàja e tude. Anton, sés incôntre fui cumbinôde pa telifône, uns mês antes e ranjôde daqél manera, pa cosa pudéss corrés drête, sem merrinha nem intôje.

Um tàva ta bem d'Hamburgo-Alemanha, ôte d'Brisbâne-Austràlia, via Lisboa-Portugal. Sés avion, d'TACV, q'pa um vêz tàva na hora, pô rôda na tchon pa cinque hora e mêia d'plumanhã, naqél madrugada d'Agôste, na pista d'Aeropôrto Amilcar Cabral, d'DjaSal.

Avion complête, chéi d'emigrante ta bem d'féria, q'coraçon pertôde d'sôdade, despôs d'tônte ône d'sacrifice na terra d'gente gentio… Log q'roda d'avion incôstà na tchon, séi qél salva d'palma na bôrde, pa dà graças a Deus d'ter izdôde qél comandante ma sé equipe, d'ter trazîde tude qél pov té porto d'salvamênte q'vida ma saùde.

Ês desimbarcà e log q'és pô pé na tchon, tude's dôs, pô d'joêi e fazé moda Pâpa, és bêjà tchon d'sés terra quirida d'Cab Verd, q'és ca tinha oiôde diâzà.

Xatisse é q'na bôrde d'avion, tive um descontrôle, quàz na hora d'tchegà, anton és squeçêba d'dà cada passager sé ficha d'desimbarque… Là, pliça pediz pa dà um help, és tive q'bà izdà quàz tude qél pov preenché sés ficha, qé tchéu d'és ca sabia lé nem scrêvé… Um grande perda d'têmpe pa tude gente!

Na mimôria, b'és qél primer vêz, q'és passàba na Sal, ta sebi pa Norte, pa bàss bescà vida na stranger, moda tchéu cabverdiano tàva cstumà fazé. Sima és contàba, fui na ônes cinquênta, naqél têmpe q'na DjaSal ca tinha nem mil pessoa…

Evoluçon fui grande despôs d'Independência, a pônte q'hoje india DjaSal, Ilha ôndé qu'um vivé dezasseis ône e tchà bons recordaçon, q'sés 216 km2, tem mâs ô mênes dezassêis pa dezôite mil pessoa, senon mas.

Pa nome d'Hôtel, naqél têmpe (ônes 50) tinha era um barracôn, moda qés saloon de FarWest, daqés filme de cowboy antigue, xplorôde p'um mandrôngue, por nome d'Sr. Gonzàga, rêi d'Ilha, mode cmida q'él tàva fazé bem d'Lisboa pa manté Hotel, facilitôde pa TAP e q'era um grande problèma pa gente d'terra, qé pov tàva vivé naqél dependência…

Prublèma d'cmida era tão grande na DjaSal, q'um vez, Nhô Plôte, q'tude gente conchêba pa sés pirràça e q'tàva ta trabaià là na Corréi, recêbé sé dnher d'trabôie na fim d'mês, cma Bia sé amdjêr, tà tinha él infrontôde q'stora d'cmida, él tchegà na casa, él pô Bia tude qél dnher num prôte driba d'mesa…

Êl ba tadzél: - oh Bia consolà, qé ca tem cmida, mà tem dnher!!! Um diària naqél Hotel era tão côre q'quàz nium criol, na transite d'viàja, tàva pensà bàss instalà naqél Hotel.

Assim, nôs mâlta verdiano, impregôde d'Aeroporto, na épca, fui sempre d'um grande sucôrre pa quàz tude nôs rmon binde d'ôtes Ilha, d'passàja pa Sal, ta bàss p'éss Munde fora, bescà vida.

Basta, és tàva fcà sempre contente d'incontrà qél môn stindîde d'um amigue, pa dàl qél bom help e tràl daqél isolamênte, triste sem ninguém, daqél sala d'spêra, d'aerôgare…

Nô tàva levàs pa nôs Pavilhon Maravilha d'Aeroporto, q'fcà na Storia d'Ilha, q'tàva fcà pirtim d'aerogare, ondé q'nôs màlta jovem tinha sés quârte, sempre q'pussiblidade d'um lugar, pa recôlhé pov pa drûmida, mode tude nôs, na épca, tàva trabià pa equipe (didia, datârde, ô d'nôte).

Assim, déss manera li, nô ca tàva tchà nium criol cunchîde ô não, drûmi na rua, té hora d'imbarcà, na dia siguinte, n'avion d'sé destine.
Cosa d'vida! Despôs d'tônte ône, mi ma éch môçe, amigue d'infância, bem incontrà néss grande dia na DjaSal, mi pa môde xâtisse e politca tinha mas d'dezasseis ône q'um ca tinha também pude pé na nha Terra CabVerd.

Anton, despôs d'uns braça, és cumçà ta contâme stora d'sés vida, cma és tàva ta bem, um d'Alemanha, ôte d'Austràlia, despôs d'trinta ône sem podé bem pa Cab Verd, ma sempre ta mandà qél sustênte pa qél pâpa ca faltà driba d'mesa na casa d'familia, ôndé q'tinha tchéu boca pa cmé.

Assim dnher ca pudia faltà pa qés menine, pa scola, pa pô qél panêla d'tude dia na lume e pa cuntinuàba ta lêvantà qél rincon d'casa, là na Cràca-Soncent… Promessa q'és tinha fête sés mãe, q'Deus hàja, na hora d'morré!!!

Xatisse cuntinuà, qé és ca tive lugar n'avion d'TACV, qél dia, pa Soncent, cosa q'tchàs lixôde e spantôde, qé da là dôndé q'és tàva ta bem, és tinha marcôde lugar q'OK, té Soncent.

Assim, és fcà na DjaSal durante um semana, mode prublèma d'sés bagàja, q'fui dzimbarcôde na Sal, sem divia ser. Mi, um sigui viàja, ma despôs d'um semana, és tchgà na Soncent, ôndé q'nô tornà incontrà, és tude xatiôde q'aqél prublèma d'transite, d'têmpe d'féria.

Cma Pov sabé, tude ône, na mês d'Jûnhe, Jûlhe, Agôste, é sempre qél galêra, qél itêrne trapaiaçon, ma prublèma d'emigrante, mal informôde, pa sés agência ma cumpainha d'viàja, sobre destine d'avion, desde pônte d'partida té tchgàda, na sé terra.

Bagàja q'ta fcà pa tràz, pa transtôrne d'passagêr, prublèma d'dsimbarcà e Imbarcà na Aeroporto d'Sal pa sés Ilha d'destine. Cosa q'jà tem um dâta d'ône, jà divia ter side resulvide pa cumpainha TACV, num stûde sério d'statistica, o q'talvez pudia facilità tchéu mode d'vida d'pov emigrante.

Tônte cuitôde q'um conché, q'perdé sés trabôie pa mode qél fàlha na sés data cêrte d'bài e bem d'féria. Fàlha na ca podé imbarcà na têmpe e hora na TACV, na regrêsse pa terra d'sés trabôie, na stranger, ôndé q'éch PATRON ca ta conché perdôn.

Tude éch cosa, pa mode falta d'ter pussiblidade d'bà pa sé Ilha e bem na têmpe e hora, ubrigôde a fcà ta sperà té ter avion. Tchéu d'és q'tàva fcà na Sal, pa consolà sés cabeça, tàva dzé q'um pôque d'ràiba cma: - d'tude manêra, jàs tàva na sés TERRA…

Prublèma é q'DjaSal, jà nñera, nem nñé qél DjaSal d'um vez q'és tinha tchôde, daqél têmpe d'nos Pavilhon Maravilha e qél grande camaradàja. Nñé Ilha q'vrà ma grande, Pov é q vrà mas tchéu, mode desenvolvimênte, o q'fazé DjaSal perdé tchéu daqél MORBEZA d'um vêz.

Un frustraçon d'gaita pa nôs tude, qé na Ilha jà tinha tchéu gente q'nô ca tàva nem conché. Qé, cma no tive tchéu têmpe longe d'nôs terra, no perdé cara d'tchéu gente q'jà ca tàva prà là e um pôque d'nôs câra também. Êss prublema, no incôntràl tmbém na Soncent, qé despôs d'tônte ône, normal, tchéu cosa ma gente mudà.

Ma, nôs consolança, nô pô t'ôtchàl, devagarim, pa mode fidje d'amigues ma familia, qônde és oiône, cumçà ta lembrà d'nôs, dà tude cosa bà t'entrà na orda.

Êss stora, hoje india, ta in time, qé agora, q'méi d'comunicaçon fàcil, um ta podé falà ma Bilela, p'Internet (Skype) na Brisbâne (Austràlia). Assim, tude vêz, no ta pô ta falà d'aqés féria naCab Verd.

Sempre, él ta falôme naqél tristeza q'él levà na sé coraçon, pa môde du q'él tinha tchôde oiôdede, q'ca tàva nada sabe nem p'emigrante, nem pa gente d'terra e q'tàva ta bà ser cada vêz pior.

Sal ma Bubista, ondé q'também él tem familia, moda él tinha mi contôde, jàs ca é Cab Verd mas! Vindide na stranger, em vêz d'na fidje d'terra, és é dôs Ilha, hoje india, jà pirdide pa pov cabverdian, na sé prop Républica.

Tude éss situaçon, mutivôde, p'um grande descontrôle d'investimênte, mal negociôde, na venda d'terreno, na zona d'xploraçon turistico d'Ilhas. Exêmple: na DjaSal ma Bubista, ôndé q'vantàja d'pov é bem pôque. pov tem tem stôde ta vendé sés casa ma terra pa quàz nada. O q'é bastante negative, qé Pov ta bà ta perdé, cada vêz, dirêite d'vivé na sé terra.

O q'é bem triste, qé terra té ta tchà d'ser d'nossa e um dia nô ca ta tem nem Lugar pa fincà nôs bandera. Dzide, cma té Govêrne ta fechà ôie, pa ca spantà caça!!! Quàl caça, quàl carrapuça?!

Assim, tude irregularidade e arbitrariedade, ô amdjôr, môda cabverdiano ta dzé, tude abûze q'direçon daqés Hôtel ma investidôr ta fazé e ta fecthôde ôie, sô ta dà Stranger, cada vez mas força na nôs terra e a força d'dnher ma nô ca ta podé cumpeti, nôs é ubrigôde a ingli pêche pa rôbe e calà boca.

Bilela, triste desgôstôze d'terra, anton contàme cma là na Bubista, dà là d'casa, és bà pa praia d'mar ma mnines, passà dia. Anton era sô viste, moda él dzême, qé um é dzé e ôte é vivél, o q'és fazél sinti na sé terra?!

Ês fazél sinti prop stanger na sé terra Cab Verd q'Deus dàl! Qé él criol e bubistiâne, fîdje d'CabVerd, ca tive dirêite nem d'entrà naqél praia d'mar q'él qris. Qé lugar tàva cercôde pa tude banda d'arâme farpôde e q'guarda.

Gente q'tàva n'Hotel era so stranger, ta andà sempre em grupe q'uns fitinha d'côr na pûlse, pa ca cunfundi q'gente d'terra ma emigrante verdiano, q'tàva pra là d'passàja, ta passà fêria. Bilela, anton és ca tchàl nem entrà n'Hôtel q'sé côrre q'él tinha lugôde, so porq' él nñera turista.

Hotel tinha turista, prà là ta vivé num cirque fecthôde, sempre cumpanhôde pa guia, q'também era stranger, o q'ta tràba fidje d'terra, sé pôn d'boca, qé nôs gente pudia perfeitamente sirvi d'guia e fazé qél trabôie.

Inda mas, q'tude qés turista jà tàva ta bem q'aqél senha d'Hôtel, desde sés terra, dôndé q'és tàva ta bem e mentalizôde pa comprà tude o q'és qria, sô là dentre d'Hôtel, d'manera q'aqél dnher ca tàva dà saida pa nium ôte lugar. Tude cosa bem canalizôde e fête d'manera sô p'és ca tem nem tivéss assim nium contacte q'povo d'nôs terra…

Nô pensà bem, nô t'ôià quàl é benifice ô vantàja q'nôs Pov podé trà d'tàl situaçon ?! Se ca tem nium contâcte ma stranger, se catém nium intercâmbio cultural, éss cosa sô ta mutivà um descalibre d'nivel d'vida d'gente d'nôs d'terra, là ôndé q'és ta vivé.

Qél cosa q'Bilela ma Terênce vivé, oià e sinti na Bubista e q'té hoje és ca pude sqeçé, lévas q'um revoltà grande na péite… Basta, qônde és tchgà na Soncent, ôndé q'és sinti LIVRE, és ba pedi orda na pliça, és mandà fetchà dôs d'sés rua, ondé q'és tàva morà, rua d'Morguin ma rua d'Crâca…

Ês dà um senhora cmida d'Ônje na dôs grande panêlona, pûste là na méi daqés dôs rua, q'um grande catchûpa q'atum, grogue e tud o qés pude pô là, na disposiçon daqél Povo d'séus… Na sés vontade e sem mrinha!

Anton, qônde rua jà tàva chéi d'gente, és vrà pa POVO és dzés: - nôs, nôs é EMIGRANTE e sempre nô manté e nô ta cuntinuà ta manté nôs familia ma gente d'nôs terra q'suor d'nôs trabôie, ganhôde suôde cansôde là na stranger, e sempre q'nô ta podé, nô ta mandà pa dà trabôie na nôs casa, q'mã Rosa tchà nôs e pedine pa cabàl…

Assim, nô ta dà Pov trabôie!!! Nô ta prop feliz, qé nô ta li ma bzôte ta bibé ma cmé éss bom catchupa q'atum, q'éss bom grogue, prop sparajôde... Basta li, na nôs terra Soncent, no ca mistîde nem fita na brôçe, nem senha, qé nô ta li ta vivé, nôs q'nôs num bom harmonia, q'mûte Paz e Amor…

Sem guia, nem nem arâme farpôde, qé li é q'é NÔS TERRA!!! E li, té gora, se nô trà nôs bûffe, nôs mêz é q'ta tchérel, qé li, nôs tude é CRIOL!!!

Nôs é q'é força, d'nôs Paìs, q'devisa q'sempre nô ta mandà, q'suôr d'nôs trabôie, ganhôde, suôde cansôde na terra d'gente…

Assim, éss nha conversa é sô pam fazé bzôte comprendé cma nô ta merêçé ser mas bem tratôde na nôs terra, ter mas dirêite e regalia q'stranger na nôs prop terra CAB VERD… Qé na terra d'gente gentio, nôs direite ma regalia é limitôde té q'nô ca ta podé, nem pià.

Assim, nô ta spérà cma nôs Governe ta ser mas vigilante e fazé mas atençon pa sé Pov, na tude éch prublèma q'um politica d'maior interêss e reagalia pa sés EMIGRANTE e emigraçon, q'té hoje india, inda tita vivé, tude sempre, ta SPÊRÂ…

E nñé pa nô seqçé nunca o q'emigrante tem fête e ta cuntinuà ta fazé pa sé terra d'Cab Verd… POVO PATRIOTA!!!

Zizim Figuera (José Figueira, jùnior)

V O L T A R