BATCHINHA D'NH'ANTÔNE BÂTCHA

Na sé stile, sô d'séu, bôina prête, calça ma camisa brônque, q'sé casôque castônhe, ma sempre q'pé na tchon, q'aqél distintive d'Club Sportive Mindlense puste na pêite, gravôde q'aqél Lião.

Batchinha fui daqés q'apesar d'equipe d'Mindlense ser incarnôde e brônque, nunca qriz trocà qél Lião d'Mindlense, Fôrte e Afamado (grande hino fête pa nôs saudoso e sempre querido B.Leza) pa qél Aguia d'Benfica.

Home d'geraçon d'gente desportista, d'ones 40/50, sempre popôde, nem cigôrre, nem côque, nem xtravagância, exêmple pa juventude d'um vez, cosa q'tàva siguîde q'ruspêite e admiraçon. Assim, moda él, tive: Eduardo Fula, Lêla d'Raùl, Ciznône d'Nha Chica Mari Chica, Blàda, Tatôche e Tony d'Picarone, Toi d'Bêdja, Lêla d'Panante, Tambrinha, Teàta e mas e mas ôtes.

Êche moçe li, fui tud daqél grande geraçon d'desportistas, homes d'força d'Mindlense d'um vez, q'jà ca ta bem mas! Ma, cma na vida, tud cosa ta passà e geraçon ta sucêdé geraçon, na lîmite d'têmpe e spaço.

Um ca podia tchà d'fazé bzôte lembrà e fcà ta sâbé tud nôs geraçon bêdje q'nov e aqés q'tita bem pa tràz, valôr q'Club Sportive Mindlense tive na épca, na educaçon d'pov d'Soncent e na passàja d'mensàja pa tud nôs ôtes rmon d'ôtes Ilha d'Cab-Verd, qé na nôs terra, ca fui praticôde so futebol.

Là na Salina, na Pavilhão d'Mindlense, tive também ginàstca (argôla, plînte, barra), cricket, gôlfe, ténis, bôxe, sem contà qés rêgàta, na Baìa d'Porto Grande q'tàva paixonà tud qél Pov d'Mindelo.

Batchinha fui daqés grande jugadôr d'cricket, jôgue q'inglês trazé pa Soncent e tàva isgôde driba d'um sterôde d'cemênte q'um tapête d'uns mêtre q'destânçia pa corré jôgue, separôde pa dôs posiçon, d'três stick e driba daqés stick, trés bills.

Grande bôlador d'fàma, él fui sempre um admirador e imitador, moda sempre él dzé, daqés super cricketman d'Soncent d'um vez, moda Nho Fula, Jon Doia, Damatinha, cunchîde pa inglês pa (Old Costa) e ôtes, q'inchnâl ârte d'bem isgà, éss jôgue d'mûte paciênça e comportamente…

Era un prazer, ôià qônde él, Adolfe D'Juff, Ti Tchûtche d'Noba, Nuna, tàva entrà na jôgue, debôche daqél tchuva d'pàlma d'assitênça.

P'adversâre, ingânha tàva paris farêl, naqél stérôde d'tchã d'cricket, q'sés boladura chéi d'mânha, panhadêra d'bills, q'tàva fazé trêmé tud gente, stranger ô d'terra, q'tàva isgà contra és.

Anton, moda d'cstûme, tàva séi sempre qél grîte de: - I say, play bola wh'as that Ampâr… abreviatura na Criol. Mà n'inglês, és tàva dzé: I say, play ball what's that Empire? Well out?! or not out?!

Dvera, dvera qônte momênte d'glôria ca fui vivîde na tchon d'Soncent, qônde Mindlense tàva ganhàba campionâte d'terra, ô contra qés carvôer, ô qés vapor d'guerra ingles q'tàva passà na nôs terra.

Qônte e qônte vêz q'éche nôs herôi, ca fui lembrôde na carta d'amigues pa amigues, puste n'andôr e cûrride, chéi d'glôria, pa rua d'nôs cidâde d'Mindelo???!!!

Despôs q'aqél mudança d'vapôr, d'carvon pa ôleo diesel, tchéu cosa mudà. Mà cma na Shell, inda assim, fcàba alguns inglês q'tàva isgà cricket. Nôs Batchinha e màs alguns fui impregôde na Shell, o q'fazé q'cricket inda durà uns one na terra.

Batchinha, mnîne queride e cunchîde na tchon d'Soncent, pa sé manêra simples d'vivé, stimôde d'tud gente, grande q'piqnim, era não sô um grande atleta, cma também um hôme pirràçente, chéi daqél humor, prop d'nôs terra.

Sempre suzùde, q'sé cara séria, stile dà q'pedra, gatchà q'mon… Tinha sempre reposta pa tud!!!

Naqés têmpe, d'cabà carvon, carvon catêm. Fcà sempr qél cstûme, d'mnîne bàss levà pai, qél balâim d'cmîda, fête d'cana d'carriçe, q'aqél bûlim d'café, na trabôie, pa pai pudéss tmàl na ponta d'câis d'SHELL, inda quente, qé temp, às vêz, tàva séi d'pôque, môde lântcha q'tàva stôde traqôde, ta bombà t'intchi d'ôleo pa vapor fundiôde ta spertà na méi d'Baìa d'Porto Grande.

Sênhor Thompson, ma Richards (inglês), antigues chêfona d'Shell, nunca proibiba trabaiador, nem qél balaim d'catchupa q'aqél bulim, qônte à mas qél tmâr d'café na ponta d'cais.

Log q'novi'ora d'plumanhã tàva toca, tud trabaiador tàva pârà trabôie e tàva bà tmà sé cafizim q'aqél catchupinha guizôde, ô q'ôve strélôde, ô qél cavalinha frîte, sem prublèma!!!

Despôs q'inglés bà'mbora d'Soncent, cumçà ta bem qés nhanbôbe, q'aqés mania sclavagista d'têmpe d'Salazar. Primêre chêfe q'parcé, fui um tàl ingînher Gomes da Costa, chéi d'tôsse, pa bem mandà na prête.

Mà, o q'él sqçêba é q'prête também tem intligencia e q'Intligência é Universal e nada tem à ver q'Instruçon…

Log q'él dzimbarcà na Shell, sé primer léi, q'él séi, fui d'proibi tud trabaiador d'tmà qél cafizim na ponta d'câis. Cosa q'tàva ixisti desd têmpe q'Shell era Shell, sem nunca chatià ninguém, nem prusdicà rîtme d'trabôie, na qél Cumpainha.

Anton, tud trabaiador, ma sés gente, fcà prop dusriantôde, révoltôde, e gô, té és tinha q'saì pa rua, diânte d'matadôr e na méi d'pov, p'és pudéss tmà sés café, debôche daqél afronta d'gente ta passà…

Pa spônte e revolta d'tud qem tàva passà prà là, chatiôde q'aqel nov léi!!! Na méi d'tud, tive sô um q'resôlvé ofrêcé resistênça, d'sé manera, a Gomes da Costa e q'fcà na Ponta d'Câis d'SHELL q'sé balaim, scônta d'nada, d'aqél proibiçon, pa desgràça d'sé Chef d'sirvice, Nhô Côbe…

Êss valente, era nôs Batchinha d'Nh'Antône Bâtcha!!! Nhô Côbe, q'um mêde d'gàita, vrà, dzél: - ô Bàtcha, d'izmôla, oià châtisse q'bô tita bem ranjâme?! Bàtcha dzél, ca bo bôda, tchà pa nha conta!!!

Anton, tchgà Gomes da Costa, sempre q'sé mania d'bajôfe, q'pôpe chéi d'vente, moda pomba, ta roncà… Êl oià cma na méi d'tud, sô Batchinha é q'continuà q'sé balaim là na Ponta d'Câis.

El bem, màu d'mûnde, pa rebentà q'Bàtcha, él dzél: - Oiça là, senhor Sebastião, então vocé não sabe ler??? Desde ontem, como o senhor sabe, eu proibi esta tomada de CAFÊ aqui na ponta do CAIS da SHELL???!!!

Nôs Batchinha, q'sé grande quarta classe, d'Scola d'Senhor Alfredo Brito, fîdje d'Antone Bâtcha d'rua d'canal d'Miller, ca dsârmà! Q'sé calma, d'cstûme, e jà q'sé ideia na cabeça, debôche daqél bôina, vrà, respôndél, num bom português: - desengane-se senhor Engenheiro, porque sei ler e bem!

Desculpe, mas que eu saiba, o senhor, o que proibiu foi CAFÊ!Por isso, mudei! Porque, hoje, o que estou a tomar é CHÂ!!! Dà inginher, largà t'arri…

Môde éss posiçon d'força passive d'Batchinha, dà qél proibiçon cabà e assim tud gente pûde cuntinuà q'sés balaim, bem preparôde, binde d'casa, q'aqél bulim d'café, qél catchupinha guizôde, infêitôde q'aqél cavalinha, ô qél uvim strélôde, qônde él tàva parcé pa tmàl, naqél descontra d'cstûme, là na PONTA D'CÂIZ D'SHELL…

Zizim Figuera (José Figueira Junior)

V O L T A R