PAULO GINGUINHAS RUFIA CRIOL (ONES 1958-1959)

Naqel madrugada d'sobd pa dming, là d'janela d'nos quart, un tàva ta oià qél mar ta brilhà moda um spéi, tè q'vapor na Baia tàva ta parcé dos, mod reflet d'cés imaja, naqel mar calmo d'azeit.

Un calor d'matà, ninguém tàva ta podé durrmi e pa completà, là na rua d'Matijim, pert d'nha casa, Lela Maninha que cé super voz tinha rancod caqel grand morna q'tinha saido na moda naqés dia: - oi calor… oi calor… oi calor… oi calor di Sinhora Rosa!

Estando eu assentado no barracão do meu Bar atiraram-me uma pedra, q'atingiu minha garrafa etc…

Anton mi, atraid paqel musquinha sabim, d'violino, d'Muchim d'Monte e ots figurant q'era, Lela Preciosa, caqel acord d'violão, moda povo tàva tchmà, aqel mon d'B.Leza.

Un ca pude resisti nha curiusidad, un tchi scada dvagarim ,là na quintal caqél catchorr d'nossa, por nom d'Nero,q d'not catàva conché ninguem…un dal uns pidrinha d'açucra scura,assim un pud squà gatchod,pa porton sem fazé barulh.

Q'not inesquicid!!! Qond un tchgà là na rua,un ba ta sigui qel son, té cun tchgà là na Bar d'Nininha d'Adão. Cma sé filha Betty tinha passod na quint one d'Liceu, prepativ d'festa tàva ta bà cumçà… o q'sabim, un tchgà dent d'ora.

Nininha bà log ta dzém: - cuidod qé jà bo fji, mod s'Ti Djo suber jà bo psù, un po déd na bic, un dzél, cmanera, li niguém catita bà dzél, e ninguém ca dzél… qé nha pai nunca sub!!!

Là na quintal, Farrop, irmon d'Viriot tud és magaref, cés specialidad era matà tchuck. Coçàl na barriga, pa ninal sone, métél un ingron d'oi (alho) na polpa pàl ca grità, qond tchukim tàva sodà, na cé sunim, és tàva dàl qél cacàda d'pau d'plon na cabeça, mà dret, pa cabeça d'tchuk ca sflaçàba.

Dspos, fui trà qél sang pa fazé tchuriç, passà tchuckim na paia q'lum, ràspal bem raspod, pa tràl tud qés cabel! Na méi daqél confuson, lembrame naqel poetica e romantica spreçon criola, d' Nho Roque (Dr. Aurélio Gonçalves) d'strofégar un tchuk!!

Batucada continuà caqel grup d'Lela Maninha, e ali pa un cert ora, cumçà ta paréc tchorésq, tripa truçidim, tchuriç d'sang q'catchupa guizob num ambient prop criol…gent dmund là na quintal! Mut rizaràda, cada um ta contà stora d'sé vida e sés vintura, p'éss mund fora!

Pàpa irmon d'Nininha cum blue (etilizado) d'gaita, sentod drriba d'uns cachote ta ptà linha, pa pescà càvàla, là na quintal sem mar. Num cantim, sentod nuns soc d'tchichorr (peixe) séc, bind d'Bubista tàva qés dos diabolico e inséparavel, Groll e Paulo Ginguinhas, parcem té q'és era prim e és catàva andà un sem ot!!!

Groll pritim, magrim, om d'sé grogue, mà valent pafronta e suor, d'qem ta pscàl guerra! El tinha fjid, num vapor Greg, imbanderod d'Panamà, q'bà aterrà là pa Brazil na Santos e dspos Pernambuco, ondé qél passà uns més valent, tratod moda un rei e inda por cima, él prendé té jgà Capoeira (guerra do pé oriunda de Angola) qél trazéba ma él pa Sãocent!

Uns dias antes d'éss festa, là na praçinha d'Igreja, não content d'oià Jorge Serradas, rapaz nov e fort q'cés trinta one, ta buzà d'um hom d'idad (60 on) por nom d'Artur Silva.

Nos Groll q'cés dos coque na butch e q'catinha nada a ver caqél stora, ca pude suportà qél abuz d'Jorge, nun hom bédj! Pchàl log pa guerra!!! Jorge fcà ta spiàl cun ar d'desprez e ta pensà na cé cabeça, cma qel gaj là, él tàva ta bà cmél q'cabel e tud…ingone!

El po Groll posiçon d'boxe, mà nos Groll po ta rudià, ta cantà Paranà é…diant d'un data d'gent, cosa ca durà mut…mon na tchon, solt d'macoq d'diant pa tràz, un tombo na ladeira, siguid d'rabo da raia e nos Jorge pésadon (80kg) pa tchon sem sabé d'q'banda, nem cmanera qél quei?! Un broç québrod Spital e tchàu.

Emidio Barreto pliça ruspeitod, mandà Casmiro ot pliça, levà Jorge pa Spital pa bàba po broç na géss, e él Emidio levà Groll pa cadeia,q'bà sem rafilà!!!

Meia hora dspos, nos Groll fui puste fora, qé és otchà là na squadra, cma és catinha nada q'fazé q'él! Paulo Ginguinhas, cé primers prim, confirmà qél stora!

Not pa madrugada, dia ta cré meché, trançod caqél baticun. Nininha, mà tud gent prop fliz, caqel quitone d'cé filha Betty, ta curti qél noitàda, ratchod paqél barulh d'tchorésq torrod na dent d'gent e qés rizarràda, siguid daqél bon grogue!!!

Pa fchà qél, moment d'flicidad, anton fui hora d'nos Paulo ptà cé stora. El mandà tud gent parà pa uvi. Q'cé stile d'rufia, pos cé prima Tmét tinha él levod pa Lisboa jà rapzim, mà q'ond él tchgà pra là, él meté na mà vida là pa Cais Sodré, Mouraria etc…

Sempr q'cé buininha prêt na cabeça, linçim bromedj marrod na pscoç, andar gingão, prop d'rufia naifista, q'cé navalha d'ponta e mola, na bols d'tràz! Méz jà q'cés 70 pa 80 one, nunca él tchà d'andà, daqél manera!

Anton, él tàva contà: - mi un fui rufia confimord! Un tinha 3 o 4 mnina q'tàva trabaià pa mi là na Mouraria! Qond Paulo tàva antrà na qés tasca, tud gent tinha med d'mim!!! Uns tàv fji ots màz corajoso tàva fcà. Mi era dod na pscà guerra.

Un tàva tchgà naqés café, un tàva pzà col d'pé daqés gàj, un tàva perguntàs: - Eh pas, de que lado é que queres cair?! Apanhas um buto na viola ou um pontapé no fole das migas!!! So q'éss linguaja és tàva tud bàmbora!!!

Ora un véz, na temp d'Sidonio Pais (1910/1918) temp d'proclamçon d'Républica tàva tem sempr tiros, bombas e pranchadas là pa Rossio! Anton fui décretod recolher obrigatrio, tud gent pa casa 18 hora! Guarda répulicana ta patrulhà etc…

Nos Paulo Ginguinhas, continuà cé storia naqel linga criol diferent, trançod q'portugués e continuà ta fazé nos arri! Um cert dia, là naqél tasca d'Mouraria, em q'él ma patron era amig, él imbalà ta tmà coque, él sqcé d'recolher! Qond él cris tmà fé era jà quàz 11 hora da note! El séi ta bà pa casa a pé, sempr liger e q'cuidod…

Qond al tàva pert d'cé casa, là pa lod de Largo do Rato na Lisboa, Guarda Républicana dàl fala: - Alto là!!! Mãos à nuca!!! Nos Paulo Ginguinhas tud trapaiod…

Guardas continuà: - então o Senhor não sabe que devia jà estar em casa? Pois é recolher obrigatório por causa da revolução. Em vez de 18 horas são agora 11 horas da noite!!! Vai mas é para a squadra e pode lhe custar muito caro com cadeia etc…

Paulo ca inrascà, moda él dzé nos, basta él po tud qél pov là na Nininha, na suspens, apesar daqél boa festa, ta sperà rest d'storia!!! Anton él vrà paqés guarda republicana, él dzés: - Oh Senhor Sargento, levar o Paulo para cadeia por outras coisas e razões, talvez sim! Mas por causa da Revolução?

Não! Pois isto é uma Guerra entre BRANCOS!!! Eu cá Paulo Ginguinhas sou PRETO e não tenho nada a ver com isso!!!

Qéz gaj d'guarda républicana, otchà qél reflexão d'Paulo q'tont piàda qéz po t'arri és dzél: - Tens razão pas!!! Vai embora e tem cuidado para a próxima vez…

Storias mà festa, continuà là na Nininha, q'gent dmund ta antrà ta séi, na mei d'rizaradas e d'vez inquant, q'Lela Maninha ta incantà pov q'cé voz é q'cés Morna té plumanhà méché…


Zizim Figuera (José Figueira, jùnior)

V O L T A R