PASQUIM (CARTA ANONIMA)

Dspos daqél redàda, bem rudiod, là na praia d'bote, pa panhà bnit, mà melon e oi lorg, q'aqél pescador, tchmod Sarda, ta merguià, na boca d'fim d'réde, pa dzingàtal, daqés pèdra, d'fund d'mar.

Tud porreir, mnin, q'gent grand, tud content, d'izdà qés pescador pxà réde. Pesca fui bom, naqél plumanhà, qé Honorio tàva stod sempr ta guità qés péche antrà na zona, e assim fui!

Anton, él mandà log ptà réde na mar e rudià qés péche. Fui un boa rédàda, pa ligria d'tud gent, mod qés pichim fresq! Assim, qés pescador, tàva tud content e fliz, d'po pov, qél péche na prote!

Un levà, quàz un quil d'oi lorg pa casa, qés dàm! Pos era nha part d' trabòi, d'isdàz, pxà réde. Anton, dspos d'venda e partilha, daqél pesca, q'tud gent cun truquim na bolse, bem séi qél pàtpàt d'fadiga, entr Nhét e Pàlàpa.

Naqél dia d'calor d'mes d'Agost e q'dos coq na bùtch, dboch d'aqél sombra, tràs d'Captania d'Port. Nhèt mà Pàlàba, tàva nun grand stora, cun dàta d'gent ta sisti, ta spérà qél tapona séi!

Moda d'cstum, motiv daqél stora é q'Nhét mà Pàlàpa, sempr qés tàva tmà coq, és tinha mania d'tàpà cumpanher, q'un dàta d'pergunta/resposta sem fim! Nhét perguntà Pàlàpa qol'era: - femnin d'pescador? Pàlàpa respondél log… PESCADELA!!! Moç, deixa stàr, q'bo é burr! Dzé Nhét!

Pàlàpa, ca reià bandera, él po log cé pergunta: - qem q'éra màs bom (valor intelectual)? Nho Bàltaz, Nho Roque o Dr. Ruzinha? Nhét, fcà trapaiòd, él po log ta gaguéjà, q'tud gent t'arri!

El chateà. Anton, él rancà, log q'cé insulta: - bo Pàlàpa, bo é fidj d'un arve inpé (fidj sem pai)!

Raiva dà Pàlàpa, q'séi log q'aqél resposta q'fazé tud gent arri, inda màs tchéu, pafronta: - e bo Nhèt?! Bo fidj d'pai incnomca (pai incognito). Clàr, q'aqél stora sem fim, cabà nun rizarada colectiv, qé Nhét e cé cumpanher, cumpàd e amig, Pàlàpa dzé d'un vez: - anton jà no fcà impot, qé niun d'nos, té hoj, ca conché nos PAI!!!

Es bràçà na cumpanher, és dzé: - nos é q'rmon d'miséria! Es cambà plurim d'péche, q'un dàta d'gent tràz d'és, bà cabà, qél truquim, daqél rédàda d'plumnhà, q'màs uns gruguim, là na cumpàd Jorge d'Nha Mari'Ncéta.

Clar, q'qond és tchgà là, plurim tàva chéi d'gent. Dà, és dsaparcé, na méi daqél pov! Mà, là na méi daqél, barulhàda, d'vendedera d'péche, q'pov tracolòd, na méi daqél calor, q'mosca pafronta, tinha sempr un pssoa, q'un stora frèsq, pa ptà gent!!!

Là nun cantim, d'antràda d'plurim, tàva qél grupim d'cstum, d'Niclàu d'Pinga, Djunga d'Nha Ninha d'Péd Nàpla e màs e màs, dondé q'tud dia dàtard, partida, mà stora catàva càbà!

Niclàu, qél dia tàva q'un oi tapòd, d'soqe q'Nha Gadjome, qél amjerona d'rua d'Coqe, q'tàva cutchi midj, él so, q'dos pau d'plon, tinha él dod, mod él q'd'vespra, tinha buzode d'cé fidj John, q'tchegàba na casa ta tchorà.

Apsar d'cé oi tapod, él tàva stod sempr q'un moral d'infer, sempre ta contà qés cena d'film, d'Tarzan e a Mulher Liopard, qél tàva gostà. El tàva contà, q'és stora d'film, q'tont força, q'él tàva fazé pov d'mund, rudià na él, pa bà uvil!

Un vez, él contà un stora d'tal manera, chéi d'paixon, ta mostrà cmanera q'Tarzan tinha matod qél liopard, q'cé punhàl, té q'él fincàba q'él punhal na cé perna! Un cort d'gaita, q'él fui levod pa Spitàl, pa cés amig, pa bà levàss pont, na cé perna.

Mà naqél tard, él mandà tud gent parà, pa bàss uvi stora d'aqél PASQUIM (Carta Anonima), q'tàva stod ta parcé, là na Club D'Mindlense.

Cert,q' tud gent tinha un dscunfiança, mà ninguém catàva ta dzé nada p'ività chatisse e spérà qél gaj, qéi na réde, él so! Tud aqil, éra flstria d'un gajim, q'tàva stod ta isgà na segunda d'Mindlense, sempr q'mania, d'ser bon e capaz d'isgà, na primera.

Ondé, mà qem qél podia, tmà cé lugar na equipa, naqél temp: Lela d'Raùl, Blada, Eduard d'Fula, Mané Prét, Ciznon d'Nha Chica?! O anton naqél geraçon, d'cé temp, q'tàva ta rancà pa substitui velha guarda, moda Totoi Munzinha, Djunga, Zuzuca, etc…

Pa isgàba na Mindlense, naqél temp bo tinha q'ser bom. Por iss é q'Mindlense perdé, tchéu jgador na épca, mod qés velha guarda q'tàva pensà ser insubstitiuivel. Log q'tàva tchgà un jovem, és tàva dzél: cresce e aparece!!!

Niclàu d'Pinga, continuà q'cé stora. Anton él dzé cma, qél gajim d'PASQUIM, cma ninguém, catàva ta dàl tençon, él resolvé mandà cé CARTA ANONIMA pa direçon D'Mindlense, na temp q'TiDjo Figuera é q'tàva, po jgador na linha.

Qél carta éra assim: "Meu Caro Senhor Nho TiDjo Figeira. Votos de saúde e clarividência! Você não anda a reparar naquele rapazito que anda a jogar nas segundas do Mindelense, muito bonzinho, com um pontapé na bola, com muita força, senão o melhor dos melhores, por nome de Djosa F, mais conhecido por Djuzinha d'B.

Tire as traves dos olhos e aquela lunetinha verde, para poder ver claro e saber seleccionar os jovens jogadores, para que eles tenham a sua vez e sorte.

Não é porque vou lá manhentar o seu lanchinho na Sociedade que você me vem fazendo tanta diferença. Pascuàl cada qual cé dia! Atenciosamente e com todo o respeito…"

Clàr, q'carta ca fui sinod, TiDjo Figuera fcà intrigod qé és éra uns três o quat, q 'tàva bà manhental qél lonch, là drriba na sobrod! El fcà cun duvda cma éra Djuzinha d'B. mas cma él era cé amig e bom rapaz, nunca TiDjo pensà cma éra él.

Un dia Dmon infàdà, Junzim Jaburù, avançad sorteod e famose d'Mindlense na épca, qéi doent! Anton TiDjo, infrontod, pâmod qél meia final mà Derby. Mandàs bà pscà Djosa F na casa, pa bàss isgà qél Dming dàtard. Vist q'aqél PASQUIM tàva stod so ta falà na él!

Djosa F, tud nervose e excitod ca cria nem cardità! Mà là él bai, bnitim bem equipod, d'icarnod e bronq, cun cagàç d'matà, mod qél grand responsablidad q'TiDjo Figuera pol na cé cabeça.

Anton, él intchi d'coràja él antrà na méi daqél eqip d'Mindlense so crack Cacàta, spiàl cum càra sério d'mund él dzél: na Mindlense qem joga não pastora. Oh Boy, li é pertà pùch, séi ta bài.

Djosa, sempr q'cé cagàç d'matà. Antrà na Comp, dboch daqés palma d'cstum, daqél pov sabe d'Mindlense! Bola na centr, pit d'saìda, d'jog, corré él so, driblà tud dfésa d'Derby, antrà na grand-ària, isulà dà um bràsa, q'nunca él tinha dod na tud cé vida d'futebulista, scàpà d'mété un bon GOL.

Inflizment, bola dà na tràv, cum força d'màtà, mà ca antrà! El proveità bola fora, él bem ta corré pa Tribuna, él dzé TiDjo Figuera: - Você já viu?! Você já viu?!

Afinal sou ou não sou um bom jogador?! Ti Djo, fcà q'cé calma d'cstum! Anton cumpàd Libertàl q'tàva là, dsmascarà Senhor Djosa F, q'jà ca po pé màs na bola, qél àtard, na Comp d'Jog, qé él era prop lofa (azelha) pafronta!!!: é bo seu sacana!

Bo é q'tàva stod ta po PASQUIM là club e bo é q'screvé qél CARTA ANONIMA da onte. Djosa F po càra na tchon, qé tud gent q'sabia daqél stora, largà t'arri pa morré!


Zizim Figuera (José Figueira, júnior)

V  O  L  T  A  R