BRAZINE: QEL CAVOLE D'NHO DJODJE D'NHO PADE

Na méi d'stora d'tude éch muvimente d'gente ma sés currida d'cavole, pa Festa d'Senhor San Jon, qel ône lassim tive um cavôle q'fecaba na Storia... BRAZINE, cavôle CAMPIÃO d'Nhô Djôdje d'Nhô Pade... BRAZINE era piqnim, bnitim, ma um cavôle rapte p'afronta.

Basta, qel ône, tinha dôde tchuva drête, anton Nho Djodje tinha él intregôde na mon d'sé cumpade Faustino, qel homona d'Maderal q'tinha um ôie d'vidre, um cône só, conversador q'ca tava podé fecà um minute calôde...

Tude ône, qônde tava tchegà ess epca d´fim d'mês d'Môie, principe d´Junhe, q'nô tava entrà na quadra d'festa d'Senhor SantAntone (13 d'Junhe) ma Senhor SanJon revultiôde, assim tchmôde, mode el q'ta tchegà sempre q'sé vêntona (24 d'Junhe), prop p'intchi, moda pov ta dzé, vela daqés navizim q'ta cumpanhà colà SanJon...

Na Soncent, qés corredor d'cavole, q'sempre tmà qel cosa mute a sério, ta tinha um alvaroçe, na preparaçon d'sés cavôle, pa qel grande dia d'currida. Cada um q'tinha sé muntada, tava ninal e dal um bom trôte só pa pudia presentà sé amdjôr limária na dia d'festa, inda mas q'aqés currida era mas queston d'honra du q'prublema d'prême o denher.

Assim, qel alviçra, sabide na têmpe, era spaiôde pa tude qés Ilha q'tava cstumà concorré. Porto Novo-SanAnton, Djar'Fogo, terra d'cavôle garboso d'sangue di burcão, Dja d'Môie q'sés cavôle bem nutride, Bubista, SaNinclàu e mas ôtes Ilha q'ca ti ta bême na mimoria grinhaçim.

Sempre es formà, moda um spêçe d'um familia, em q'tude qés done ma corredor d'cavôle tava conché cumpanher. És era quaz tude cumpade, qé jàs ta tinha levôde fidje d'cumpanher pa centre d'batisme. O q'ca tava storvàs qel grande rivalidade.

Dôs semana, snon mas, antes d'festa, naviu tava cumçà ta tchegà na Porto Grande d'Mindelo, carregôde d'algnuns carner pa izdàss dzimbarcà, qés cavôle binde das Ilhas... Tava usôde carner, qé basta ptàba um na mar, tude q'es ôte tava sigui, assim cavôle tava intchi d'coràja e tava qéi também.

Siguide pa bôte, tude qés bitche ta nadà, tava ba séi, ô na praia d'Miller, q'tàva fecaba na camin d'Puntinha, ô na Praia d'Bôte... Ôndé q'aqes done ma sés gente tàva bà fecà ta speràs, saì nadôde, na praia, pa despôs levàs pa crral pa ba dàs trôte, pôs ta scançà strà perna, pa despôs cumçà qés trêine la pa zona d'Rebêra d'Vinha.

D'SaNinclàu tinha binde Muchim Pénoso, grande amigue la d'nos casa, q'sé cavalon brônque, d'unha grande e pé lôrgue, q'tava fazé um barulhe d'màtà naqués calçàda d'nos rua, qônde el tava bà tmà sé côque là na rua d'Matijim…

Na rua, pa pirràça ma galantaria d'nôs menine, era fcàba pa tràs d'sé cavôle sô pa dzél: - ô Nho Muchim, bocé cavôle jà squà rôbe !!! Sô pa nô pudia uvil dzé, na sé criol funde d'SaNinclàu : - Iau Môçe ? Cumbersa i êss ! Sé xpresson e sé manera tava pô tude gente, la na rua, t'arri... El, q'sé nhânha, inda tàva credità e tava bem somà na porta, pa spiaba s'era dvera ?!

Basta, era uns lûxe, ma uns sparate, tude naqel fulìa d'préparaçon, pa qel dia q'gente tava ôias cada um q'sés cavôle, q'uns bjôfaria d'matà, q'tàva dà povo impresson té cma qes bîtche era tude pure-sangue q'tava valé milhon.

D'DjarFogo bêba um cavôle prête, garboso tchmôde Flecha, q'mas tarde Nho Quim Chavinha compràba e pôba nome d'Flash. Trazide p'um Senhor d'nom E.Dantas, mute bom corredor d'cavôle q'pov butzàba pa nome "d'cabalero".

Flecha, q'despôs vra Flash, era um bnite cavôle, bem tratôde, ferradura na pata, qônde sé done tava séi q'el pa rua d'Mindelo, era um bleza ôial ta bem, tude limpim, bem scovôde, dôde bonhe, na sé pôçe cadenciôde, tude garbôze, ta fazé qel barulhe d'fer na pedra d'calçada.

Basta, pov tava somà na porta só p'admiraba qel bîtche e moda tud gente tava ta dzé, el é q'tava ta ba ser surpreza d'currida qel ône lassim.

La pa tcheqêr (lugar d'crià tchuck) tinha qel cavôle brônque d'Nho Peçente Pôçe, rmon d'Brumêdje ma Tite, tu d'és fidje d'Nhô Pôçe, por nome d'Faìsca, cavôle vicioze, dôde na pon d'mîdje q'té paia verde él vraba ta negà...

Na rua d'Moeda, cara q'cara q'Manim Strêla, tinha Sulvêste d'Mã Balica (Ti Silva) chéi d'sparàte q'sé cavôle, q'Eduardo d'Nhô Jon Chaline butzàba pa nome d'Fédagoza, cavôle q'él tinha scapôde d'fome e q'tude menine la na rua jà tava conché...

Pa gôze ?! Ti Silva compraba Fédagoza ma dôs mula na tropa q'tava ta ba'mbora d'Soncent pa um cruzôde (cem scude d'hoje india). Cma tropa jà ca tava stôde ta fazé bem paia pa bitche d'Continente, qés animal cumçà ta morré d'fraqueza...

Basta Ti Silva, chéi d'boa vontade, inda pa tentà salvàs, ba imprestà um zorra puxôde pa Chima ma Cantai e trazés pa casa. Ma qés dôs mula, inflizmemte e pa tristeza d'gente daqel rua, morré logue na dia siguinte.

Anton fecà Fédagoza, qel cavole famôze, fidje d'miséria, chéi d'fraqueza, q'ca tava corré quâz nada, q'té menine d'nôs rua trll um cantiguinha pa chatiaba Ti Silva, q'era assim : - Ti Silva muntà na Dagoza / Mã Balica sopràl na polpa / El parti na femaça,pa Jerusalém…

Qé dvera dvera, Fédagoza q'vraba mascôte d'nôs rua, ca tava corré quâz nada, mode qel fraqueza q'el tinha passôde e Ti Silva tava stôde ta cré ixigi demàs d'Dagoza. Anton, era logue um chatiçe qônde qés menine tava pô ta subià qél cantiguinha.

Qé Ti Silva, inguiçôde moda el era, tava bá logue fazé quixume na casa d'cada um... No tava cmé uns pascôçada, ma nô ca tava imendá. Um vez, raiba fui tão grande q'Ti Silva entraba pa casa d'Nhô Jon Chaline q'Fédagoza e tude, quebraz té balcon d'loja, ta persigui Eduardo, fidje d'Nhô Jon, so pamôde el q'tinha subiôde qél cantiguinha…

Fui log um abôle, siguide d'rizaràda pa tude pov daqel rua.

Assim, na Soncent, cada cavôle tinha sé stora e sé nome: - Fidalgo d'Ti Manel d'Matos, Smoky d'Quim Chavinha, Faìsca d'Nhô Peçente Pôçe e ôtes q'tava bem das Ilhas, sem nome, ma q'tava bem parteçipà naqel alvaroçe daqel currida d'dia d'Senhor San Jon.

Na méi d'stora d'tude éch muvimente d'gente ma sés currida d'cavole, pa Festa d'Senhor San Jon, qel ône lassim tive um cavôle q'fecaba na Storia... BRAZINE, cavôle CAMPIÃO d'Nhô Djôdje d'Nhô Pade...

BRAZINE era piqnim, bnitim, ma um cavôle rapte p'afronta. Basta, qel ône, tinha dôde tchuva drête, anton Nho Djodje tinha él intregôde na mon d'sé cumpade Faustino, qel homona d'Maderal q'tinha um ôie d'vidre, um cône só, conversador q'ca tava podé fecà um minute calôde...

El era tão conversador q'um dia és ta bem na camionete d'Maderal pa morada, el perdé 100 scude, q'naqel têmpe era denher, num posta ma Ti Manel d'Matos, só pàl guentaba sem falà d'porta d'Sumter dzôite dõs ôite té tchegaba na Padaria d'Matos... Quâz ta tchegà na meta, conversa d'pov na camionitim tàva tão nimôde q'Nho Faustino, imbutchôde, ca pude guentà, dà xpludi.

Anton, él vra pa cumpanher d'viàja, el dzês : - ôm, bzôte tchame falà, qé qônde Deus dà um home boca é p'él falà e bzôte podé fecà q'bzôte 100 scudim d'gaita. Fui um spônte geral, ma ninguém ca xprimentà ri na sé cara...

Qél cavôle d'Nho Djôdje tàva prop bem tratôde, largôde boca na paia d´midje verde, ma pega saia à vontade, là pa horta d'Nho Faustino... Também bem treinôde pa ganhà mas um currida, cosa q'tude gente tava ta sperà, qé jàl tinha ganhôde três ône a fiu.

Qel ône lassim, ca era Toi Tita q'tava ta bà muntà BRAZINE… Qé posta era grosse! Anton, Ti Jack Simente, q'tava sé quebradon, mode sé lujinha diazà ca tava stôde ta rendé nada...

Resolvé postà tude sé furtuna na BRAZINE, cavôle d'fama, q'tude pov tava ta dal pa gônhe... Nhô Djôdje, qria pa Tita muntal, ma Ti Jack Simente, teimoze, rafilà qé denher era d'séu, dzé log cma não ! Qé el tambem sabia muntà cavôle...

Dia d'currida, tava quâz ta tchegà e tude cavaler q'pressa pa preparà sés limària. Era ver bzôte ôià qel barulhada d'matà na rua d'Matijim, q'nôs amigue Mayca Barrônque, também cunchide pa XPEDIENTE PA RÂPTE, tude suôde, d'camisa aberte na pêite, forte q'nem um touro, ta comandà tude qel muvimênte.

Mayca, grande artista, ablidôze, sabia fazé tude cosa, além d'ferrà cavôle, él tava também transformà qés latinha d'lête condensôde baziu em caneca d'bibé àga na pôte, candirim d'pitrole, canecona, concertà, fugon prime. etc etc…

La na ferraria d'Jon Flinêr, ôndé q'tude menine tava stôde, sempre prônte pa ba bombà fôlje d'forja, pa lume fcaba sempre vive, pa vançà trabôie e ganhaba qel cruzôde pa pon trança q'mel la na Deminga badia, q'nunca prendé tchmà crôquete, quel tava fazé q'sé mon, prop sabe... Basta, qônde el tava pôs na venda, el tava da qel grite, la na rua d'Matijim, pa tude gente uvi : - D'ULI TROPÊDI QUÊNTI !!!

Qel batucada tava cuntinuà, q'Senhor Mayca Barrônque ta ferrà tude qés cavôle naqel rua strête, intepîde d'pov, ta bai ta bem, côque sem merrinha, qé qel vêz grogue era pure cana e cinqe toston d'él, na butequim, era um côpe d'aga bem intchide e el ca tava matà ninguém...

Era pegà cavôle na pé q'jitim, pôl ferradura, dà prêgue, dobrà prêgue, despôs limà prêgue, limà unha d'cavôle benitim e là, Mayca Barrônque ca tinha dirêite d'ingnà. Ma tude qél pov q'tinha ône jà tava conchel, tava fazêl cunfiança, qé el era prop bom na sé trabôie .

Na Ferraria d'Jon Fliner tà tinha momênte q'era moda Infêr. Era qés crôve quente d'lume, sempre ta saltà,ta caì, qônde tava dôde marreta derriba d'chapa pa indrêtàz, naqel rîtme quâz musiqal, dôde pa martilim, ta cumpanhà trabôie naqel imbiente d'calor, trançôde d'suor e q'tude gente ta fazé cuidôde pa ca quemà na méi d'tude aqel fagon d'LUME...

Um vez, Mayca Barrônque, q'tàva andà sô scôlçe, qé nunca él gostà d'sapôte, q'sés pêzon 52 d'sola d'pé, dure moda fêrre, cstumôde t'andà scôlçe, la pa qés tchon dure d'Montssusségue, ma Tchã d'Sumter, tava ta malhà chapa q'marreta, ma sé cumpade Lexandre, d'Nhô Toi Lulu.

Qônde um crôve qênte em braza saltà, qéi na tchon.... Nôs Mayca ptà pé drriba d'el, fui log um tchêr d'carre quemôde, q'tude pov ta grità : - ôh Mayca, cuidôde !!!....

Era fume ta squàl debôche d'pé, num confuson d'gaita... Nôs Mayca, valente, na tude sé calma e sangue friu, bá ta limpà sé sola d'pé q'sé mon, ta dzé pa màlta : - não faz mal... não faz mal ! For d'pé dure Deus ?!

Despôs, él dà q'mon na sé pêitaça, el tornà grità : - ôh meniz, ca bzôte boda ,Mi é q'é Mayca Barrônque, fidje d'Mané Lucas, rmon d'Jack d'Beta, boxeur e Vula Capton !

Trabôie ca parà e tude qés gente q'tàva là tocal palma e nos menine no fecà tude n'admiraçon pa sé força e resistença. Despôs, tude cuntiuà na sé ritme normal d'um ferraria, sem ralaxà q'él vigilancia, mode lume, ca quemàss gente.

Anton, tchegà dia d'currida. Tude qés cavôle fui levôde plumanhã log cidim, pa Rebera d'Vinha, ondé q'era ponte d'partida. Currida era fête la pa qés banda, pa ca prujedicaba festa religiosa, missa d'Senhor SanJon, q'tude gente tava bà sisti na Rebera d'Julion.
Ma também, log q'missa tava cabà, tude qél pov tàva dzabà, pa bem ôiasse qél currida.

Cada um tava bem, moda él tava podé, uns a pé, ôtes muntôde na limaria, ôtes naqés camionitim d'frête. Tude qel pov, log q'és tava tchegà, tava fecá linhôde dum lôde e d'ôte d'strada, pa fazé qél camin, na linha dum banda e d'ôte d'pista, q'era passàja d'cavôle pa amdjor pudésse sigui qel currida.

Pa nimà imbiente, log d'entràda, tive um currida d'burre, bnite pa fronta, quebrada qés muringue d'bôrre binde d'Bubista e q'tà tinha surpresa d'tude spêçe, por dente. Naqes muringue tá tinha pomba, manga, banana, drops e qônde qés corredor d'burre tava quebràs, dà tava fazé ligria d'tude qel meninada q'tàva proveità pa bàss catàz…

Tude qés gente, puste d'um lode e d'ôte d'pista, d'antigue cômpe d'aviaçon, q'tava cumçà da là d'Rebera d'Vinha, té li derriba na tcheqêr (lugar d'criá tchuck).

Era pov pafronta ta grità mêz antes d'currida cumçà, ta sperà qél tiro d'partida... Q'emoçon cada vez mas forte... Qés Cavôle, tud linhôde… Nho Peçênte Pôçe, q'sé Pistulinha d'bala branca, ta spià p'arlôje, dà um primer tire, ma falhà... Nada ca séi ! Anton, qel sigunde tire fui bom… Logue qés cavôle largá, debôche d'grite d'tude qel pov, one time…

Situaçon d'currida tava dvera prop cool, q'Flecha qel cavôle d'DjarFogo pa diante, tude qés ôtes pa tràz, num barulhe d'côsque, ronque ma grite d'pov, q'aqél cavôle d'Nhô Djôdje d'Nhô Pade sempr, pa trâz d'Flecha.

Nho Djôdje chatiôde pafronta, sempre ta dzé cma nñera normal BRAZINE stôde ta fazé um cuurida daqel manera, qé el era imbatàvel e q'jàl divia ter largôde diàzà, tudr qés ôtes cavôle pa tràz…

El tava sfregà mon na cabeça, el tava grità: - Como é possìvel ? Qé pa Nhô Djôdje, sé cavôle ca tinha hipôtse d'perdeba, embora él sabia cma Edmundo Dantas era um bom cavaler, amdjôr q'Ti Jack Simente...

Anton, cavôle quâz 100 metre pa tchegá na meta, q'Ti Jack Simente, chéi d'raiba, pa mode el sinti, cma el tava ta bà perdé, pô log ta grità : - ÔH NHÔ DJÔDJE, ESS CAVÔLE D'BOCÉ E UM CAVÔLE DA MERDA…

Nho Djôdje, q'também era mute bom cavaler, chéi d'xperiença, comprendé log qel situaçon e notà cma falta ca tava na BRAZINE, sé bom cavôle, q'nunca tinha pirdide um só currida diazà...

Anton, mêz da là d'longe, él pô sé porta-vôz na boca, el grità bem ôlte pa Ti Jack Simente e pa tude gente uvi : - NÑÉ BRAZINE Q'É UM CAVOLE DA MERDA !!!...

BÔ É Q'É UM AZELHA !!!... PORRA, FOLGAL REDIA, FOLGAL REDEA… Inda assim, Ti Jack Simente uvi, él folgà BRAZINE rédia, BRAZINE inda dzabri, jà tarde... Inda él cunsigui fecà na sigunde lugar.

Na fim, tude qél pov caì Ti Jack derriba, mode él q'perdé... Um vergonha ! Ma smême assim, cma él fcà na sigunde lugar, inda el cunsigui salvà metade d'sé posta, q'squebràl!

Pov d'Soncent, fairplay moda el é, ba tude q'aqés rosare d'desta,felicità Sr. Edmundo Dantas ma sé cavôle garbôze, Flecha, qel trazéba d'DjarFogo e q'ganhaba qel grande currida d'Sr.SanJon, sem merrinha e q'tude honra.


Zizim Figuera (José Figueira,junior)

V  o  l  t  a  r