Brincadera Inocent d’Mnin d’Nos Rua

Qél pressa q’tud mnin tinha, d’séi d’scola dàtàrd e bà ta corré pa casa, bà fazé sés cosa d’scola, prend sé liçon so pàs podia dzél: cma jà bo fazé tud, agora bo podé bà brincà um gzinha, na rua.

Anton na nos zona d’brincadera q’tàva panhà: d’padaria d’Matos, pràça Stréla, rua d’Matador, Plurim d’Péche, Praia d’Bote, rua d’Praia, rua d’SantAnton também cunhicid pa rua d’Matijim, rua d’Sanjon, rua d’Tràvessa d’Praia, rua d’SanBandera, rua daLuz, rua d’Moeda, rua d’Talione, limit rua d’Côc…

Durant qél poc temp, q’no tinha d’cinq hora dàtàrde té sète hora e méia da not, hora q’tud mnin tinha q’bà pa càsa, lavà pé mà mon, jantà xixi détà. No tinha temp d’inventà tud spéçe brincadera .

Pa ràpziàda, cma sol inda tà stod qent, éra qés juguinha d’fùtbol, d’bolad’meia, dèz trocada vint càbàda, nàqél pélàda tràz d’praça Stréla o anton naqél praçinha d’sment, d’Nha Fina d’Niclet, qond càtàva tem pliça na zona.

O tont topàda, sola mà unhona d’pé, spancod e squod naqés tchon, mei areia, mei calçàda, na mei daqés juguinha ! Cumpanher tàva bem ta corré, bem socorréb : tchàm oià, tchàm xixib na él, p’él podé curti ! tchum ptob éss tirrinha fina dà él ta curà. O anton, bà ta corré pa mar bà làval.

Cert é q’nhum d’nos morré d’téta…apesàr d’tud éch risq !

Também qond catinha bola, tinha ots jog: pica-pau, q’sé circunfrencia na tchon, um tàca d’pau, grand d’um mètr, caqél puntinha d’pau d’dèz cintimtr trabaoid na dos ponta…bo tàva rancà q’jog, dent daqél circ, cum tàcàda, dpsos bo tà levàl màs lonje q’bo pudéss, ta dàl naqés ponta e ta trà tàcàda… tchmod dà bébèba, so bo falhà, bo perdé… ote tàva cumçà… éra um art !!!

D’nutinha éra currida pa dsafiu, rudiàda rua, o q éra sabe dmund, qond bo tàva somà na bo rua, um drriba ot dboch, q’tud bos culiguinha, ta grità bo nom, pa bo podia sforçàba, pa tchgàsse primer na méta, nos éra piqnim mà no tàva sinti grand, qond sobretud, no tàva ganhà, qés mnin daqés ot rua…

Também tinha stickàut, imitàda film d’cowboy sport mà bandit, mangàchàda q’gent tàva contà : um doli tà é d’mendà um doli tà! Sél caiba na bo, bo é q’tàva bà panhà tud gent.

Tà fazid também currida d’bàràta, dent dum càxa d’papélon, ganhàda pon d’trança q’mél d’Dminga badia, q’sé déd chùz d’siré, mà q’tud mnin tàva gostà, qél tà frà qél pon e ptob qél 5dcl d’mél d’cana d’SanAnton ta rogobboas pràgas, pa bo podia tornà bem !

Ora q’gent ca tinha q’fazé era fingi brigà entr nos, diante d’gent, meté qél pau na càca d’catchorr e mandàs pegà na él, faça d’conta q’mi mà qél ot tàva ta bà brigà.

Mà às vez, influença faz falença, qé, és tàva bà fazé qixume na casa, qé nos, no tàva corré ! Qond no tàva tchgà na casa, és tàva tmà nos d, lot…

Pa mnininhas, éra roda roda cinq cantim, ondé qés tàva, rancà sempr caqél canti-guinha : sapatinho delicà… licà… licà… odju pa céu… olàl… olàl… o anton és tàva isgà ring, brincà putim, dà dazét, muntim d’catchorr.

Trividinha é qél q’antrà na casa d’nho pàdre, robà um pé d’mejéricõ pàdr fri um ? Noss tàl ? Pusqé ? Tupa ! Pàdr fri dos etc…s’bo éra um, bo ca respondéba bo tàva bà pa rob d’fila !!!

Dspos d’tud éch actividad, jà lusc fusk, gente tàva stod cansod , mà sempre q’gràça d’fcà na rua mà nos cumpanher, pos tinha qés màs velh o màs vélha, q’tàva sentà naqés praçinha d’sment, d’nos rua ondé, qés tàva bà ptà stora.

Stora, Stora Fortuna Sàmé, mà piqnim ta bà panhà, mà grand ta bà cercà. Assim tàva cumçà, tud storia d’Ti Lob,mà Ti Ganga, mà Chibim, mà Santuck Catém Pulpinha, pa incont d’mninàda… sobretud qond storia éra contod pa Uriza d’Nha Rosa Mendes…

No tàva entrà na casa q’cabeça chei de sonh d’mnin ! Cantamà, qond bo éra ubrigod d’antrà na casa sem tchà, storia cabà. Porqé hora d’antrà na casa éra sagrod pa tud mnin daqél rua d’nossa.

Assim na ruspeit, sempr pa màs bédj, log ca qés mãe tàva cumçà ta grità nos, jà no sabia, q’éra sèt e méia da not e q’éra hora d’antrà pa casa, pos tud aqés mãe tàva dob fàla e bo sem rafilà o bo cré o bo cacré, bo tàva bai sem spià pa tràz, qé n’ot dia éra dia d’SCOLA….

Zizim Figuera ( José Figueira,jùnior )

V O L T A R