TCHON D'MINDELO SE POV E SES VENDEDERA

Pa nimà e cabà d'culuri qel Morabêza d'Mindelo, ma sé Pov, q'na Mûnde, moda él ca têm dôs.

Pûquim, na Cab Verd, ma Pov sabe q'sempre sube recêbé gente binde d'tude parte d'Planeta Terra, sem distinçon d'raça ô côr, sem ninhum frustraçon ô complêxe e ta pô na sé lugar tude aqél q'tchgàba na terra q'sés mania…

Qé, moda Tutchim d' Nh'Antonha Guimar tàva dzé, gente d'Soncent ca tem mêde d'ninguém, qem bscàl t'otchàl e na tûde cosa, na Scola, na Boxe, na Futebol, na Cricket etc…

Êss comportamênte d'nôs Pov, d'Soncent, é cosa q'diàzà ta merecêba um spêcial stude social na nôs terra. Qé um vez, um amigue braziler, por nôme d'Elias, na seriêdade dzême: - puxa séu Chàpa!

Eu não entendo não?! O Povo brasileiro assimila todos os Povos do Mundo, mas o diabo é que o Cabo-Verdiano assimila o brazileiro!!! Eu, quando chego cà na terra, mi sinto Verdiano, mêu !!!

Anton, mi na gôze, um tàva dzél cma té 'cavaquim' nôs é q'imprêstàs él, qé antes d'él bà pa Brazil, él passà na nôs Cab Verd primer.

Ca tem dûvda, cma éss Morabeza, fui criôde durante tchéu têmpe pa nôs gente, desd'diàzà, mode qél abertura e qél contacte ma stranger, fête là na sé sala d'vêsita, q'sempre fui nôs Porto Grande…

Dvêra Elias, tinha razôn, qé um vêz, na nôs Porto Grande tive fundeôde tchéu têmpe, pa mode guerra, dôs tanker italiône, por nôme d'Arcola ma Tayguête e Gerarquia (vapor d'carga), q'também era italione…

Pov, pôba és nome d'Tanker d'Catchûpa, mode qés italiône vrà ta cmé sés catchûpa tude dia, na bôrde (assimilaçon cultural na cmida).

Assim, tchà falà qem cré ma nôs Pov d'Soncent, fazé sé prop educaçon, q'lêvàl, râpte a comprêndé, té hoje, cma na vida é Spêçe Humâna é q'ta contà pu'riba d'tude arrelôçe e cosa d'éss Munde…

Plu mênes, assim q'nô fui criôde na nôs rua, d'tchôn d'Soncent e tude gente, mnine q'gente grande, tàva sigui, naqél ritme d'vida, d'isdà, ma defêndé cumpanher, d'sabé partilhà ma vezim, qél troca d'Amizade firme, trançôde q'aqél Morabeza q'seja ma gente d'terra o ma strânger.

Um ta lembrà, qônde um vezim ta stôde doênte q'és tàva bà guentà Cabeça d'cumpanher, fazé qél côlde d'burrache ô canja d'galinha, debôche d'pobrêza, mà q'coraçon grande… Tamônhe d'Munde.

Qônde um vezim tàva matà tchûke, na sé quintal, quàz tude gente, daqél rua, tàva tmà sé parte, pa mode qél tchûkim éra ingordôde q'rêste d'cmida d'quàz tude casa, d'gente daqél rua…

Basta, mnine q'gente grande, qônde és tàva cmé um banana, és tàva gordà, sempre qél câsca pa qél tchukim. Despôs d'tude éch considrâçon, tinha também qél priucupaçon d'ganhà vida, q'é natural na tude suciadade.

Anton, na terra, cada um tàva fazé moda él tàva podé. Homes, pa stiva d'vapor na Baìa, amdjêr, tchéu d'és, pa carga na câis… Ma também tinha nôs VENDEDÊRA.

Cinq hora d'plumanhã, na cantâr d'Gôle, jà bô tàva uvi qél meludia, ta séi d'funde, d'sés garganta, ta presentà pov, tude spêçe d'cmida na rua d'nôs cidade, cosa q'tude gente tàva aprecià q'grande prazer.

Q'tude honra e q'certeza, nôs vendedera, sempre fazé parte também daqél conjûnte, na troca daqél Morabeza, prop d'Mindlense.

Tude gente sabia e tàva ruspeità sés trabôie, qé qônde és tàva somà na rua, q'sés venda, jà's tâ tinha arguîde desde cidim, inda q'scûre e trabaiôde bem trabaiôde, na preparaçon d'sés venda.

Pa és, q'mas razon, não sô era qél despertar d'dia q'tàva interêssà, cma também tàva fazé parte d'sés luta pa subrevivência na méi daqél pobreza, o q'era mûte importante, sô p'és pudéss garantiba sés fîdje qél panela na lume d'tude dia!

Assim, qél barûlhe d'plôn ta cûtchi mîdje, ma balôie d'tênté là na nôs rua, d'madrugada, tàva fazé parte d'nôs folclôre, era sempre alerta pa tude vezim, q'tinha tchûke e q'tàva bà compràz qél farél trôde daqél mîdje batchîde e tintîde q'és tàva trançà ma casquinha d'banana, casca d'manga, côlde d'borrêga d'pêche e tude o q'fôsse pussivel pa dà qél tchukim, p'él pudia rancà q'força qé él era, côfre d'casa, ma vezim.

Despôs daqél trâr d'farél, tàva bem qél mîdje, plôde ô muîde, na muidôr d'pedra, pa fazêba qél farinha d'cuscus o pàpa o preparaçon daqél cicle d'catchupa.

Tude tinha q'fcâba prônte antes d'Cantar D'Gôle, qé despôs era qél muvimênte d'venda, cada um q'sé cantiga…

Tude dia plumanhã, qél tchirim sabe d'cuscus quente, tàva intchi nôs rua e um vez prônte, qés vendedera tàva rancà cidim, porta a porta, qé és sabia, cma tude gente tàva gostà d'compral, inda quintim e na hora de café, antes d'mnînes bàss pa scola e pai pa trabôie.

Té inda, um tem na mimoria e na nha uvide, qés meludia chéi d'marabidja daqél cantar d'tude nôs vendedera q'tàva intchi nos rua d'Mindelo d'ligria musqa e côr, t'anuncià sés venda, frisquim e fête chéi d'amor.

Sempre, na mêi d'és tinha qés q'tude gente jà tàva conché, pa sés venda mûte limpim, moda Nha Lorença, Nha Julia, Nha Jona MariNhaMãe, Tudinha, Tchitcha etc…

Log cidim, nô tàva gostà d'uvi Nha Lorença, q'pa mim fui sempre qél amdjôr cantadêra d'venda d'rua, na méi d'tude qés ôtes, qônde él tàva rancà q'aqél: - ULI LEIIITE, ULI CUSCUS QUENTE…

Log, qés porta d'casa tàva abri, inda q'luz d'cânder, na tude qés rua, ondé q'nô tivéss q'é tude gente, tàva fcà ta guitàl passà e spéral pa comprà qél ratchinha d'cuscus.

Pa mode, nhas gente, na dvêra, qél primer bînde d'cuscus, d'plumanhà, moda nha mãe, q'Deus haja, tàva dzé é q'era mas petitôze! Dvera, él era tão bem fête, q'às vêz, él catàva tchgà pa tude gente, moda tûde cosa sabe!

Ver é qél tchêr, sabe, qônde Nha Lorença tàva stâmpà qél binde d'cuscus quente, q'tàva stôde bem cubrîde e protigîde pa qél panim brônque, prop limpim… Tude gente, nôve chéi d'força, q'apetite, era bem capaz d'cmé um bindim d'cuscus daqés Nha Lorença, inter, él sô! Tão sabe q'és era!

Mà, cma na casa, era cada um sé ratchinha q'mantêga, qé boca éra tchéu, mãe tàva xticàl p'él tchegâba pa tude gente d'casa! Nha Lorença tàva subi, às vêz, cinqe mà séis binde d'cuscus, por dia là na nôs rua e és tàva cabà sempre qél hora mêz.

Na continuaçon d'despertà d'dia, tinha também, qés ôtes vendedera q'tàva bem ta tchgà. Era Nha Julia, q sé balôie d'môte d'tude spêçe, binde d'SanAnton, q'tàva sirvi pa curàba gente tude spêçe d'doença.

Êl tàva fcàba là na entrada d'porta d'Madêral, ondé q'és tàva vêndé àga, té dez hora d'plumanhã. Ela também era um grande cantadera, d'funde d'garganta, na venda d'sés môte, jà cunchîde na tchon d'Soncent, pa sés efêite d'cura d'tchéu doença.

Nha Julia, tàva cantà sés môte, naqél refrôn prop sabim d': - ULI CIDRIRINHA, MA VELGATA, MA PAIA TECHÊRA, MA MALVA PA FAZE CHA D'MÔTE… E PIURIM, BA LAVA CABEçA PA MATA PIÔIE…

Tude gente, tàva comprà, qé qés chà d'môte éra dvera, prop sabe e bom pa saùde, q'uns gôste sem igual, moda velgàta ô pàia techêra etc…

Anton, dia jà mas vançôde, tàva parcé qés ôtes vendedera d'bôlacha, bôle de mêl ma çûcrinha, tchôrrésque, trûçide, tchûriçe d'sangue e màs e màs. Tude vendera, d'dia q'sés vanadôr, tinha q'tem sés venda, bafôde mode 'Mosca' ca tàva faltà, inda mâs daqél hora.

Assim, qés vendedera, ilêgal, na maioria, divia tràba um licença d'venda na Fazenda ô na Câmbra. Ma tchéu d'és, ca tàva trà qél Licença, mode gônhe, pa sustentà sés familia, era tão pukim, num dia, q'ca tàva tchgà, nem pa dà um pardal um lônche.

Anton, pliça tàva bem d'squadra, pa rua, q'ôrda d'panhàba, tude qés vendedera ilêgal. Qél cosa, era sempre um spétacle! Qé pliça, tàva tâcàs!

Ma, vendedera também tàva contr'atàcà, pa sés inteligência e orqanizaçon, pa fêji d'môn, daqés pliça.

Ês tàva pô sés fîdje, ma amigue, ta guitàba longe, na ponta d'squina, paevitàba q'pliça tchgàba d'rapênte, driba d'és, sem ninguém sperà.

Assim, log q'pliça tàva parcé, là longe, ta bem, bo tàva uvi qés gritim, d'LOOK OUT ta séi d'squina a squina…

Dà, bô tàva, ôia qél trapaiaçon d'tude qés vendedera, spaiôde ta corré, pa bàss gatchà, moda és pudéss. Qé tinha pliça d'ruspêite, moda Emidio Barrête, Raspa, Smênte Armôde, Dantas, etc…

Anton, um véz, Pistola em Pûnhe, qé pov d'Soncent, pirraçente moda és é, é q'butzâl q'éss nome, moda és pôba ôtes. Sô porqé, um dia, qônde él tinha entrôde na pliça d'nove.

Na sé primer sirviçe d'rua, pa tude lugar, ôndé q'él passàba, él tàva t'uvi mnines, sempre ta grità, LOOK OUT…

Êl tchgà na Squadra, él perguntà sés cumpanher, qzé qria dzêba LUTCH OUT, és xplicàl cma era CUIDÔDE n'inglês… Assim fcàl na mimoria!!!

Anton, no dia siguinte, novamente d'sirviçe na rua, log qél uvi qél primer LOOK OUT, sem mas xplicaçon, q'és divia ter él dôde na Squadra, él trà pistola… Tude gente, q'mêde, corré dali pov cascàl nome d'Pistola em Punhe.

Nôs Vendedera fui sempre alma d'um Pov, consolôde, q'sempre lutà pa sé subrevivência, na méi d'sé pobreza, ma na ruspêite…

Porqe, sé mal q'él fazéba, sempre fui d'procurà sirvi sé Pov, pôl cmida na gête d'sé prôte d'amdjôr manera q'él pudéss, pa tudes'dos, pudéss cuntinuà ta crià sés fidje, n'HORA D'DEUS…

Zizim Figuera (José Figueira,jùnior)


V o l t a r