CAIZIM - HORA D'MELÔDE PA TCHÂDA

Desde q'Mûnde é Mûnde, hôme dêvé ter tide sempre um grande priûcupaçon d'bescâ sabé, p'ôndé q'tude cosa q'él ta cmê ta bài! Não?! Qé, moda nôs tude sabé, na Natureza nada ca ta perdide, nada ca ta Criôde, qé dum manera ô d'ôte, um dia ô ôte, tude Cosa ta transformà! Moda nh'amigue d'infância SaNincla, na sés mâxima d'filûsufia, tàva dzêne, là nôs rua d'SanBandera: - nô t'inglil, n'inglidôr, squâl na squâdor…

Assim, mâs nô bà ta vançà na têmpe d'Stôra d'Munde, mas no ta bà t'oià cma éss prublèma tita fcà dvera, cada vez mas cumplicôde! Qé Pov, ta tchéu na Munde! Ma lugar é q'ta cada vêz mâs pôque! Mà hoje, um tita bem tentà sô fazé bzôte vivé qél châtisse d'um vez, d'nôs Mindelo, cidade marabidjôsa e sé Currêi d'Esgôte Aêreo… destinaçon final… C A I Z I M.


CAIZIM, destine d'tude verdade d'nôs terra q'oià vive, mà môrte, là na sé morâda… CAIZIM Réi,q'sés trône bem rudônde, ta spêrà pôlpa d'cada um, CAIZIM vitma, CAIZIM d'tude gôze, ma pirràça…

Basta um vêz, té nôs poeta satir, Ti Junzim M., fazêba él, um poêma assim: - neste lugar solitàrio/ onde tôda maldade se apâga/ tôdo o cobarde faz força/ e todo o valente se caga!!!

Daqés verdade q'nôs tude sabé, ca ta dzidê, ma ta fazé tude gente arri! Qônde gente ta falà d'él!

Li néss stora, nô pudia flâba d'Soncent tude inter, sobre éss prublèma! Mâ pa frâlda, na épca, també tinha Côvada, ondé q'tude pov tàva cstumà, pa pô sés balônçe…

Flizmente q'sempre tive Sol mâ Giâda ta trabaià 365 dia num ône pa matâba tude qés Micrôbe!!!
CAIZIM-HORA D'MELÔDE PA TCHÂDA… Êra assim q'Mnine Pirù, Damônçe ma mnine d'nôs rua, tude dia q'Deus tinha na cruz, tàva grità, qônde novi'hora da nôte tàva dà, naqél arlôge d'Câmbra Municipal d'nôs cidade d'Mindelo…

Là, nô tàva oià qés mônzàda d'amdjêr, ta séi d'brôque d'tude banda, q'sés lâta d'novi' hora (càca),na cabêça, dirêçon, CAIZIM…
Tude cosa néss Munde, tem sé Storia e sé xplicaçon! Caizim Imperial nunca tive culpa, dà là d'ôlte d'sé pulêre, drriba d'mar, moda um Castêl!

D'ser pr'além d'Cagatôrio Publique, d'nôs terra, ôndé q'tude gente tàva bà pàgà sé maldade, cma também Cêntre d'recêpçon d'tude 'Merda'd'Mindelo… Ma sé prisença, naqél zona, traduzi um situaçon, moda tchéu ôtes, q'nôs Cidade e nôs Ilha d'Soncent, sempre sofré…

Ca divia ser! Mâs, assim fui!!! Um Cidade d'aqél, num altura q'dnher ca tàva faltà na terra, q'tude condiçon pa ser um grande cidade d'Costa d'Africa, não sô pa môde sé bom Porto d'Mar, cma também, pa sé situaçon na geogrâfia d'Munde…

Fui sempre vitma d'complôt d'meia duzia d'gente, q'tàva mandà na épca e q'tàva conché sô qél triste xpresson de: remêta fundos! Ondé q'tude qél dnher, d'tônte vapor fundiôde na Baìa d'Porto Grande, bài?!

Êss passàja liçim, é sô pa lembrâ, tentà sclarêcé e passà mensàja pa nôs Nôve Gêraçon, p'és podé fcà ta sabé cma naqél têmpe, q'inda nô ca tàva conché avion, jà Mindelo d'Soncent Cab Verd, tinha sé Cûrréi Aèreo…

Bem organizôde! Um sabé, cma log q'bzôte lé éss xprêsson, 'Cùrréi Aèreo', bzôte tem q'pô bzôte méz pergunta, q'um gzinha d'spônte e admiraçon?! Mâ, calma! Qé cosa, ca fui bem assim!

Uli mâs um stora d'nôs Cidade, moda d'cstûme, sempre chéi daqél culûride, prop Mindlense.

Ora naqél têmpe, em q'nôs criôl, subretude mnine, era cûnvincide cma purtuguês ca tàva pùpù, môde és éra brônque! Um monzâda d'pergunta tàva invadi nôs cabiçinha d'mnine, d'nôte na nôs cama, qônde nô tàva bà dêtà!? Porqé és, e não nôs? Tude nôs tàva sempre procurà sabé, na mâs bêdje e mâ grande, ôndé q'tàva nôs diférença!

Tude éch pergunta, tàva otchà sés resposta, na simplicidade e cabêça daqés amdjêr d'valor, d'nôs terra, q'durante ône e mâs one, prestà um 'Grande Sirviçe'a tude qél suciadade, sé Pov, naqél Mindelo quirido, sem ninguém nunca dà fé, ô procurà dâs qél valor, q'elas sempre merêcé.

Prublèma é q'ca tinha esgôte na Ilha! A não ser um ô ôte tube desordênôde q'tàva séi d'casa d'inglês, ô d'casa d'alguns daqés brancâja, contôde na dêde q'és tàva tchmà d'esgôte! Tude aqél ôte pov d'nôs terra, ca tinha ôte soluçon. Ô és tàva bà câgà na tchâda, ôndé q'és tàva limpà q'pêdra, q'fôlha d'charûtêra, ô bombardêra, ô anton q'àga d'mar.

Qem q'tàva morà na môràda, ta tinha sé làta d'novi'hora na câsa, ôndé q'pov tàva fazé tude sés nescidâde durante o dia, q'um pâu travéssôde driba daqél lâta, méi d'àga d'mar, ôndé q'gente éra ubrigôde d'trêpà, môda um papagôie, fcà centrôde na méi, pa pudia câgà, justim dentre daqél làta, ôndé q'bô tinha q'fcà ta dfendé q'pôlpa daqés ruspingue d'àga d'màr, pa ca moiâba polpa.

Moda d'cstûme, na méi d'éss mônte d'amdjêr d'valor, q'tàva fazé despêje d'cidade, tinha uns q'nô ca pudia sqçé nunca, q'pa mode sés trabôie, vrà ta fazé parte d'mùbilia d'terra d'Soncent, pa sés grande sirvice, q'sempre és sube prestà Ilha: Nininha mãe d'Currûka guarda-redes, Pinhaus, Antonha Sulibana, Nha Bêta e ôtes e ôtse… q'tàva formâ um verdader frênte d'libertaçon scatôfilo d'Mindelo, não sem sqçé, Top d'Top q'tude pov tàva conché pa nome d'MARI SALÊMA…

Qem q'tàva fazé qél trabôie, naqél têmpe ca tàva fcà sfrençôde, nem pa sé desmanzél, nem tàva morré d'fôme, qé um lâta despejôde êra cinqe scûde e um litre d'midje, na épca, éra dôs scûde. Assim, sés fazêba dêz volta num nôte era cinquenta scûde, q'êra qél pâpa, garantide na casa.

Assim, tchéu d'és tàva cumçà dêsde plumanhã cidim, q'sés arrêdia na cabeça, ta carregà àga d'Vascôna pa cà d'gente q'tàva bem d'Tarrafal d'Monte Trigo-SanAnton, ô d'Madêral, na Soncent, pa intchi naqés pôte ma mûringue, fête d'argila, q'tàva bem d'Bubista, vindide là na Loja d'Nhô Iszé d'Sulina e q'tude gente tà tinha galantaria d'têba na casa, sentôde driba d'areia moiôde, pa pudia fazé qél àga fcà prop frisquim.

Naqél têmpe, também é d'lembrà cma ca tinha canalizaçon d'àga dôce, na tchéu casa. O q'era um verdader prublêma. Assim, prêçe d'cada lâta, carregôde na cabêça d'amdjêr éra igual, tônte plumanhã, cma pa novi hora da nôte.

Qônde muviment d'làta d'àga dôce tàva cabà, là pa volta d'méi dia, q'és amdjêr tàva fazé um brake. Anton, és tinha d' corréss pa casa, po qél panêla na lume e cuidà d'sés pé d'barriga, asssim cma, d'pé barriga d'sés fîdje.

Naqél têmpe na terra, pa àga doce, ca tinha contrôl e amdjêr pudia carrégà durante tude hora d'dia ô d'nôte, mâ cma él éra vindide té mêi-dia, ca tinha ni um problèma.

Mâ, pa qés lata d'dêspêje d'câca, d'nôte, contrôle era prop sevêre, qé pràjà ca pudia ser nunca antes d'novi hora! Anton, na Caizim tinha nôs Girôlde pliça scocàcâca, q'éra ixigente p'afronta e ca tàva tchà ninguèm spêjnà làta d'cmôa fora d'hora là…

Log q'd'nôte tava fechà, êra Antone Grigôla, na sé biciclêta, jà cunchide pa sés cûrrente ferrûgente, sempre ta rintchà q'fàlta d'mâssa, q'p'um lôde éra bom, qé qés amdjêr, tude tàva fecà log q'cuidôde môde qél barûlhe d'pédàl d'sé biciclêta…

Qél contôle d'Antone Grigôla, tinha q'ser pa mantéss cidade limpe, porqé às vêz, tinha um ô ôte amdjêr daqés q'naqél carrera, pa Caizim, tàva dà topâda, anton era um chatisse, d'làta pa tchon, trançôde daqés tchêre d'matà môrte, etc…!

Log qél vôz rôque, chéi d'grogue d'antône Grigôla, tàva ratchà, nôte scûre, q'um: - pânhà sua porca!!! Xprêçon q'tàva dà sempre guerra! Qé, um moda MARI SALEMA, q'catinha pàpa na linga, pa tude gente, tàva respondé log q'um: - porca é bôcé Nh'Antône! Jà bzôte pensà, log qzé q'tàva dà, qés guerrôna… Ês tàva cabà sempre na Staçon d'Pliça!!!

Anton, era Antône Grigôla pa trâz, q'MARI SALEMA pa diante, direçon pa Staçon d'Pliça, mâ qés guerra ca tàva durà mute, era tchgà q'um pé, séi q'ôte, qé ela, tàva vrâ tude gente dôde, là na Staçon…

Ela, pa bûze, tàva pô ta chatià tude qem parcé prà là! Cma Chêf d'Pliça tàva infrontà, q sés cosa, és tàa ptàl logo fora. Ela éra um amdjêr d'despêje d'força e sem igual, porq'él éra râpte e tàva ganhà, assim tchéu dnher, num sô Sônte dia!

Ma também, cma ela ca tinha fîdje, nem hôme, él tàva tmà sé grogue, lorgue e sem brincadera… Prublèma, é q'ela ca tàva fuscà nem flàça e tàva gostà d'mêté q'tude gente… q' sés mima, q'tàva fazé Munde inter arri na tchon d'Soncente, ta cantà, gritôde: - bô tem uim galôze… oiiii!!! Boa!!!

Moda tude ser humane, néss Munde, ela tinha sé grande paixão, dvéra dvéra terrivel e prop fôrte, pa nôs Djô Féi (Sr.José Inocêncio Silva) e log q'ela tàva stôde tmôde sé cânha, ela tàva cambà log pa rua d'Lisboa, direçon Loja d'Djô Féi…

Anton, na rua d'Lisboa, éra um verdader delirio, qé ela tàva pô log ta canta Djô, qél cantiguinha, gritôde, q'tude gente, jà tàva conché: - bô tem uim galôze… oiii, oh Djô bô é di meu q'certeza!!!

Anton, nôs Djo, raivôze, tàva parcé na porta q'sés luneta, reiôde pa nariz abôche ta grità, ôlte, moda um dôde, sem resultôde: onde està a policia? Chama a policia! Tude qél Pov, tàva somà na porta, ta gôzà qél panorama…

Anton, nôs Djô tàva vrà mâs dôde e tàva grità pa MARI SALÊMA: - sai da minha presença sua barriga de gazoile… agora é q'éra arrri!!! Moda Pov ta dzé ABSÛRDE ca ta splicôde, qé senon, él tàva tchà d'ser ABSÛRDE!!!

Apôz mniz, MARI SALEMA mâ nôs DJÔ FÊI dos personàja Mindlense, um scâtofile e Ote, q'tàva dzé, sér o Visconte do Castelo de Vila Inês, q'té inda, sés ruina ta là camin d'Almeiron…

Morré na mesm'dia e fui intêrrôde p'ironia d'destine na mesm'hora!!!

Anton, Mari Gàga, q'também éra cumpanhera d'dêspêje e q'tàva conché q'él AMÔR infrontôde d'MARI SALEMA pa DJÔ FÊI, parcé drâpênte, là pa porta d'Igreja, q'um canéca chéi d'sal grôsse, dà ela pô ta rufnàs qél sal na cachon, num gritâida: - D'VAI Q'NUNCA MAIS VOLTA!!!

Pa spônte e interrogaçon d'tude qem q'tàva ta passà prà là e q'ca sabia daqél Mistêre, daqés dôs criatura d'Deus…

Zizim Figueira (José Figueira, Junior)

V o l v e r