PINTODE Ô MARRUSQUIM

Era assim q'tàva tchmôde na linga d'capton d'falûche, ma pescador d'nôs terra, qél pêche strônhe grandon q'tàva cstumà parcé, d'vêz inquânte, na àga d'canal d'Soncent/SanAnton, perigôse pa navêgaçon, sobretude d'nôte, ô d'madrûgada. Basta, as vêz, sô mentâl na boca, na hora d'ptà bôte na mar, jà tàva trà alguns pescador coràja d'bàss pescà na lôrge, log cidim.

Cada um tàva contàl d'sê manera, uns tava dzê, cma era baleia! Ma, Sanincla, Franck Spadjête e Ferrêra, q'fui arpon pescador d'baleia na mar S. Ninclàu, tàva firmà cma não, qé baleia tàva soprà, ma qél pêche là, não! Qé jàs tinha él cruzôde uns dôs vêz, là pa qés mar fora, ma él ca tàva soprà!

Cosa confirmôde pa Ti Câi (Zacaraia) pescador d'Tarrafal d'Monte Trigo (SanAnton), rmon d'Tiana, d'Djê Ferro, q'tàva cumpanhône q'bôte na caça submarina, sempre q'nô bàss merguià là pa qél Sul d'SanAnton, panhà d'Baìa d'Tarrafal, Ponta d'Tum té Baìa d'Poçe d'Pâu, ma Praia Formosa, ôndé q'tive incaiôde qél vapor (Liberty Ship-John Smêtssler) mercône, q'fazêba flicidade d'pov d'nôs dôs Ilha q'môia d'midje, pantchêra…

Anton, d'nôte, là na casa d'Toi, n'oréla d'mar, debôche daqés coquêr d'Praia d'Tarrafal na volta d'uns gruguim ma bâfa, preparôde q'morabeza pa Mari Tereza, sé amdjêr, pa trà friu d'àga d'mar, despôs daqés mergûi, cumpanhôde pa Ti Nêitche (Ernêste) ma Honôrio, cumpanher d'bôte, ma cûmpade Luter, na violão, q'Jaime Nascimento ta cantà.

No tive q'parà p'uvi Ti Câi q'tinha sempre tchéu cosa d'mar pa contà, qé là él bem q'stora triste d'um baleia q'tàva bem tude ône, tem fidje, na àga quente d'Cab Verd, spécialmente naqés costa d'nôs Ilha d'SanAnton, antes d'rumàss pa Sul, pa àga mas friu, ôndé q'és tàva bà ôtchà mas cmida, pa cabà d'crià sés fidje… Ma qél ône làçim, fîdje d'baleia incaià, morré dentre d'parte debôche d'Baìa d'Tarrafal!

Assim, qél baleia, sempre ta sôprà, dsuriantôde, tive quâz um semana, tude dia datardinha, ta bem, entrà na Baìa Tarrafal, q'é funde, d'uns 15 mêtres, là na pé d'tchon, bem tchorà sé fidje… Ta bombà d'tal manera, q'tude gente tàva uvil tchorà, q'pena, sem podé fazé nada pa él!

Uns dia despôs, cunvincide d'morte d'sé fidje, baleia parti pa Sul, anton là, tude gente d'Baìa d'Tarrafal pude bà isdà, ptà qél baliinha na mar, qé antes sé mãe ca tàva ta tchâz e jàl tàva té ta tchêré mâfe… Ês mârral um corda na rôbe, és bà cambàl là fora na lorgue ôndé q'tubaron tàva bà cabà d'tmà conta d'él e fazêl desaparcé.

Pintôde ô Marrûsquim, naqél nôte cuntinuà ta fazé parte d'nôs conversa e Ti Câi, anton bem xplicône cma era um qualidade d'pêche, mûte grande q'pescador tàva stôde ta dà conta pra là e q'mêde, sobretude na canal d'SanAnton/Soncent, ma q'ca tàva soprà, moda baleia…

Ti Câi inda crescentà, cma dzîde q'té desâstre daqél falûche q'abriba àga, na canal, por nome d'Nossa Senhora da Fàtima, q'um ta lembrà e bem, qé nô perdêba Chalinne naqél desâstre, um amigue d'infância, q'tchàba pov d'nôs rua d'SaBandera, na Soncent, tude transtornôde e chéi d'tristeza… Teria side, quâz q'certeza, d'chôque d'falûche, ma um rotcha na méi d'Canal…

Tropa d'Ponta d'Jon Riber, ôndé q'era côrtél um vez, q'uvi grite na nôte daqél desâstre, sem podé fazé nada, qé era d'nôte scûre, inda és lumenhà ôlôfôte, ma naviu jà tinha bôde pa fûnde, là na méi, entre nôs Djêu dos Pàssaros e Ponta d'Jon Riber e prà là, mar é sempre funde e ca tem rotcha… Anton, fcà sempre éss duvda, na cabeça d'tûde gente, cma qél choque teria side entre falûche ma Marrûsquim Ô Pintôde???!!!

Ti Câi, anton perguntame s'um tàva conché Ricôrde, qél pescador q'tinha boca ratchôde sô d'um banda, là na plurim d'pêche d'Soncent? Um dzél cma sim! Anton, él dzême cma Ricôrde q'era bom pescador d'cûrrique d'bicûda na Canal, é q'sabia e bem stora d'Pintôde ô Marrûsquim, mâs q'niguém na zona e q'él Ti Câi, tàva tchâme p'um bàss perguntal, mi mêz, assim q'um tchgàba na Soncent, pâm pudesse uvi stora prop d'sé bôca e fcàss ta sabé amdjôr…

Ricôrde, dvera era bem cûnchide na méi d'pescador, pa sé boca ratchôde pa banda, defêite d'nascença, inflizmente, ma também pa ser um valente resulvîde daqés mar d'nossa… Êl tinha sé casa na Rbêra Bôte, ma cma él tàva vivé él sô, assim, él tàva passà sê têmpe mas era naqél lântcha bêdja d'carvon, baziu q'tive rastôde tchéu ône, là naqél rastador d'Shell, pêrte d'Plurim d'Pêche.

Moda pov tàva contà, Ricôrde nascêba assim pa môde qônde sé mãe tàva q'él na barriga, ela tive um paixon pa um URSE d'um grûpe d'Saltibônqe d'Cirque, binde d'Hungria, q'passâba na Soncent na bôrde d'paquête Mâla Real Inglês, ta bà paqél Sul abôche, fazé sés spêtacle. Assim, és trazé alguns bitche daqés pa terra, ôndé q'és andâba pa rua d'Soncent ta dà show. Anton, Marilena mãe d'Ricôrde, fcà dôde naqél URSE q'tàva pô ta dançà jûnte ma um macaquim, tude vêz q'és tàva tocàs um tamborim.

Marilena, imbalôde, sigui qél grûpe, pa tude banda d'tchon d'Soncent, qél dia p'ondé q'és bài té hora q'és imbarcà pa bôrde d'Mâla Real, pa cuntinuà viàja… Moda ta dzîde, naqél cstûme e tradiçon d'terra, qônde um mãe ta estôde na sé stôde, q'él ta dsêjà um cosa tchéu, q'él ca ta podé obtêl ,anton mnine podé nascé q'manha (figura daqél cosa q'fcà fixo n'ideia d'mãe) na sé côrpe… Assim fui sina d'nôs Ricôrde, q'nascé q'mêtade d'câra daqél URSE!

Êss defêite q'natureza pô Ricôrde, pa força d'pensamente, s'contra vontade d'sé mãe, qé natureza fui mas fôrte, ca tàva stôrval fazé um vida normal na méi d'sé pov d'Soncent, q'sabia ruspêità sé valor d'bom pescador e bom home q'él era. Cma sempre, um cris sabé verdade d'stora d'Pintôde Ô Marrûsquim e q'aqél conversa na Tarrafal d'Monte Trigo, q'nô tive ma Ti Câi. Tude éch cosa fcâme na mimoria, e là,vontade ma curiosidade d'falàss ma Ricôrde ca tava ta faltâme e era cada vêz maior.

Anton, junte ma nh'amigue Hermine sapater, mas cunchide pa Böring, nô falà déss stora, él dzém log, ôm nô bài môçe, qé ésss cosa é dvera tcham bà levôde na sé cumpanher bôte, Dade, qé és ta stôde sempre djunte, tude dia, là na Praia d'Bôte, ta cmôdà e fazé rêde…

Assim, bô ta podé falà ma Ricôrde tambem! Ma qél dia làçim, nô ca tive sôrte d'otchàs pra là, no bà embora! Na dia siguinte, um tornà argui cêde, um bem ta detchi pa rua d'Praia abôche… Qem q'um t'otchà, sentôde n'areia d'Praia d'Bôte, naqél sexta-fêra d'plumanhã, log cidim, dia clôre q'Sol jà ta bêjà, tête daqés casa, ma tude qés rua la pêrte?

Nôs Ricôrde, pescador, fazêdor e cmôdador d'rêde d'malha, moda d'cstûme, ta cmôdà um rêde d'sés bôte, q'tinha ratchôde d'vêspra, qonde és dàba um fliz rêdàda là mêz, n'ôrela d'Praia d'Bôte, q'sqêbràba tude és e bem sqébrôde p'uns dia lôrgue…

Ês tive d'dzême cma Ricôrde nñera facil d'falà ma él qé nñera tude gente qél tàva gostà, ô dà abuze inda por cima, él tinha dficuldade na falà, o q'era normal, mode sé boca. Assim, él ca tàva cunsigui articulà. Exemple: pêche, él tava dzé êche, farinha era harinha, pau era àu, açucra era aùcra etc…

Ma, qél dia él tàva ma Dade, sé cumpanher d'bôte e grande amigue, q'um tava conché bem, mode él era guarda-redes d'sigunda d'nôs Mindlense, na épca. Assim fui bom, qé um pude bà ta tchgà d'pêrte e dvagarim, qé mi também qônde mi era mnine e moda tude mnine, um tinha mêde d'Ricôrde. Anton, um salvà Dade q'jà sabia cma um cris falà ma Ricorde, qé Hermine jà tinha él visôde. Dade bà log ta dzêm bachim n'uvide pàm pediba Ricôrde bençon… E fui log!

Senhor Deus, q'aqél ideia d'Dade q'um cumpri ta dzé Ti Ricôrde pa ptàm benzon, um fazé um grande amigue… Ti Ricôrde q'sabia bem nha nome e tava conchême mas bem du q'um tàva pensà! Pô log ta falàm d'Boxe e nhas prôeza na tchon d'Soncent etc… Conversa tàva prop imbalôde, despôs él vra pa mi, él dzême cma daqél hora, gûela tàva sêque, s'um ca tàva ptà um cusinha?

Fui log, um bà la na Bar Tubarão, um tma um litre d'grogue fiôde, là na Ti Faustino, um trazé pa él ma Dade e màs alguns q'parcé, és partimoda era cstûme, na méi d'pescador!

Là, mi ma Ricôrde, anton pô ta falà d'cosa e d'ôte té tchgà na Stora d'Pintôde, moda él xplicôme, cma pescador d'Soncent é q'tàva tchmàl assim e Marrûsquim era nome pûste pa pescador d'SanAnton ma capton d'faluche q'tàva travessà nôs Canal. Sê stora q'diàzà um tava q'graça d'uvi cumçà d'um manera jà quente q'sés dôs gruguim na bûtche, q'Dade ta traduzi, o q'um ca tàva ta podé comprendé… Ma fui devra um cosa daqés q'contçé, ma q'pôque gente sabia.

Ricôrde dzé, cma era na mês d'Morçe, têmpe d'vente e pesca d'bicuda ma djêu, na currique (pesca d'linha,q'isca vive) na Canal d'Soncent/SanAnton. Anton, és tinha ptôde dôs bôte na mar, là na Praia d'Bôte pa três hora d'madrugada, inda q'scûre.

Num bôte tàva él na voga, moda d'cstûme, Dade, Ferrera, Nhête e Nhô Tôtone q'és tinha cstûme d'bà panhà na camin, là na Matiota (praia d'bônhe d'um vêz) o q'dàl nome d'Nho Totone d'Matiota. Naqél ôte bôte, mâs pa tràz, ta bem qé na mar cumpanher é djunte, moda Ricôrde e tude pescador ta dzé. Tàva ta bem Tchûcé, Tchifinha, Pàlàpa ma Dmingue Paps.

Tude qés dôs bôte, ta bem um tràs d'ôte, sempre incostôde n'oréla d'tchon, té tchgà na ponta d'JonRiber, pa séi pa lorgue… Tude cosa tàva ta corré dritim, qé mar dvera, tàva paradim, moda s'él tava dôde d'azête, q'dia ta clariscé, ma inda sem Sol, qônde és passà Ponta d'Jon Riber, pa Lim D'Guintche…

Linha na mar, q'dôs na rême, ta guentà bôte, pa mode currique, qé bicuda, p'él cmé e na isca vive e sempre na currida… Ês, sempre ta bài imbalôde na sés pesca, qônde drapênte, Nho Totone d'Matiota, q'tàva na rême d'proa, oià qél sombra ta bem, na mar dvagarim, cada vêz ta proximà d'sés bôte, qé dzîde, cma Pintôde Ô Marrûsquim, tàva pensà cma bôte o naviu, era rotcha na méi d'mar, anton, él tàva bem pa bem coçà sé costa, q'era chêi d'lapador, q'tàva mordél e coçàl p'afronta.

Qés môçe, na bôte d'Dmingue Paps, fazé moda és tinha és dzide, e és ca tava mûte longe d'bôte d'Ricôrde… Qônde és oià Marrûsquim, és entrà, rême, és tude detà na funde d'bôte, és fcà prop quitim, sem mexé e bitche passàs justim, debôche d'bôte.

Ricôrde, ma Nhête e Ferrera, siguérôde, na pesca d'currique d'bicuda q'Dade na rême ca tàva ta tmà fé d'prisença daqél bitche, anton fui là q'Nho Toton d'Matiota, q'jà tinha él ôiode, fazéum asnera d'matà! Pa spêrteza, él bà na fûnde d'bôte, él panhà qél spitcha/crôque d'panhà atum, él bà picà qél bitche, na lômbo… Q'sgràça!!! Bitche spantà, sûqedi bôte ruvrà num abôle d'matà q'tude ês quâte na mar fui um cosa sô!!!

Ricôrde, pescador d'xperiença, dzé log sés cumpanher pa ca largasse bôte, assim és fcà drriba d'bôte ruvrôde, moda ôtes pescador tinha és inshnôde, ta sperà qés ôtes cumpanher pa bem panhàs…

O q'fui fête! Ma, Nho Totone d'Matiota, q'era bom nadador, sem pensà na prigue, vrà él dzé sés cumpanher cma terra tàva pêrte, él tàva ta bài ta nadà! Ricôrde, q'era patron d'bôte, fca lixôde, e ma tude qés ôtes, és dzél q'nñera p'él basse! Ma él ca cris uvi q'ninguém. Dmingue Paps, q'tàva um gzinha longe d'bôte d'Ricordee q'tinha és ôiode ruvrà, levà inda quâz um hora pa tchgà na és. Ma pla graça d'Deus, él panhàs tude sem problema e q'vida.

Nho Totone, q'um sôrte d'tubaron ca ter él panhôde, bem naqél ôte dia pa Ponta d'Praia, q'um bajofaria d'gàita, ta contà qél stora cma él tinha nadôde bem nadôde, té q'él sintiba, fôlego d'pêche trâz d'él!!!Cosa q'pô tude gente t'arri!

Ma prublèma era sêrio! Anton él, q'um data d'pov, tude trâz d'él, qé declaraçon jà tinha side fête na Captania d'Porto e alviçra jà tinha curride na zona e quâz tude tchôn d'Soncent… Qônde tchgà Ricôrde, chéi d'raiba, chéi d'razon, ta bâbà t'abri camin na méi d'sé pov, ta falà moda él pude, cumpanhôde pa Dade ma Nhête e qés ôte cumpanher, daqél ôte bôte, q'tinha és panhôde e salvôde vida…

Êl fchà mon, él dâ Nho Totone d'Matiota, qél bom sôque, dà ptà na tchon, cabà él scômpole, bem scûmpude pa mode sé bôte q'él tinha és fazide perdé e q'nunca màs pra vida, s'él tàva andà mâs ma pescador na bôte, qé él nñera um verdader home d'mar! Qé home d'mar, ca ta bandonà cumpanher nunca, qé cumpanher é djunte!

Pov reagi bem e comprendê situaçon, ninguém ca meté, Ricôrde inda fcà mas ruspeitôde du q'jàl era, inda por cima Bans organisà um rifa mâs um coleta pa qem cris dà, là na Plurim d'Pêche e fui tchéu q'dà! Um semana despôs, Ricôrde tive sé bôte nôve, q'era tude sé vida!!!

Zizim Figuera (José Figueira, jùnior)

 

 V O L T A R