ROÇEGADOR MA ROÇEGA NA BAÌA D'PORTO GRANDE D'MINDELO SONCENTE CAB VERD


Um dia, na méi daquel falta d'carvon q'terra já tava stode ta sinti, Bruno tive um ideia, na méi d'sé quebra, d'ba spiá Mayka Barronque, la na Ferraria d'Jon Fliner, na rua d'Matijim q'um bocôde d'carvon pedra (carvon-cardiff ) p'el xprimentaba na forja !?...

Lume pegá, Mayka log reagi e ba ta dzé Bruno boca fiuza ?! Qé ess cosa ta bunzim d'munde. Se bô tem mas, bô ba bescá, qé Jon ta feca ta comprobe tude el pa nôs forja

Moda Storia ta contá e tude povo sabé, Ponta d'Praia d'Bôte, na Soncente, fui naqués tempe d'carvon ma d'vapor na Baìa, um verdader scola, ondé q'tava prindide pa mode quel contacte, tchéu linga stranger, remá, nadá, merguiá, etc... Basta, dôs cosa q'tude menine tava prendé na sé primer contacte q'zona, antes d'lançá, naquel ritme d'bescá vida na Baìa d'Porto Grande, era NADÀ e dzé quel…

FUCK YOU!!! Na tempe q'Mala Real, Blue Star e mas ôtes paquête tava passá pa nôs terra, carregôde d'passager, q'durante tchéu tempe nimá vida d'nôs cidade d'Mindelo. Menines, na méi d'tude esss muvimênte, tava proveitá d'fazé sés scola d'vida, sempre cumpanhode pa mas bêdje, qué um vez formode, es tava representà, na vida d'sés familia, mas um home d'trabôie q'tava trazé quel truquim pa casa pa isdá garanti quel panela na lume d'tude dia...

Ma despôs, cma cosa bem vra mariôde, q'mudança d'vapor a carvon pa vapor a diesel, tonte menine cma gente grande tive q'mudá d'rume e spià vida d'ôte manera. Uns imbarcá pa stranger, ôtes bai pa SanTmé ô vrá pescador e qués q'já era roçegador d'funde d'Baìa, cuntinuá na sés roçega...

Pa és, vida cuntinuá na mesma, q'aquel ptar d'bôte na mar, log cidim, pa bass panhá buzona, cavole marin, buze cabra, porque-spin e tude o q'bess na rêde, lá pa funde d'Galé, qués tava xcontchá, limpá, puli pa trocá ô vendé, na bôrde, pa sés subrevivência.

Sés instrumente d'trabôie era fete d'um armaçon d'fer, na boca d'um rede fete d'corda gross trançôde, largode pa trás. Naquel parte debôche, tinha um fer moda um lamna, q'tava ba ta rastá, na funde, puxode pa força rême, na broçe d'roçegador. Cma naquel tempe ca tinha draga pa limpasse porto, pov tava tchmás também home d'limpeza d'funde d'Baìa...

Ech raston, gente tava otchás linhôde na tchon, la na rua d'Côque, na ferraria d'Toi Ferrer, perte d'casa d'Nha Gadjome. Qués armaçon d'fer bem trabaiôide pa nôs artista Mayka Barronque, um verdader obra d'inginharia, completôde q'aqués rede d'trançôde d'corda, fete pa ôtes dôs artista, Brune roçegador ma Dade pescador, antigue kipra d'sigunda d'Mindlenses, la na Praia d'Bote.

Durante tude qués one q'carvoer passá ta scarregá carvon binde d'Cardif ma Newcastel (Inglaterra) na nôs Baìa d'Porto Grande. As vez na descarga, qués chute ma lingada d'carvon q'tava scupli contra mestre, ca ta tinha tempe d'mandá pará, qué pa inglês "time is money" assim tude quel carvon tava ba pa mar... E fecà la ta juntà tude qués ône.

Pov d'Soncente, butzá qués carvon d'carvon Nhôcass (Newcastel) e carvon Cardiff... Antes, na tempe d'fartura, ninguém tava pensá na panhál, a na funde d'mar, quétude pov tava usá quél carvon fresque d'Cumpainha, naqués fagon fete d'lata d'pitrol baziu, cortôde quel boca driba, fazide um pôi d'bôrre, guentôde pa uns firrim, q'um boca aberte pa lode pa ventiá quél lume... E q'tava dá conta d'recode, qué el trabiá dritim e bô tava otchál na quaz tude casa d'Socente !

Ess carvon fresque tava otchôde na venda, sempre na zona d'Praia, sirvide pa qués amazona, moda Biquessinha, Taivon, Djena d'Tunguinha e tchéu ôtes amdjer nadadera, panhadera carvon na lantcha... Pa vendé ! Storia d'bescá vida !

Um bescar d'vida não sem risque, qué na mar tinha tubarão q'panhába Pole d'Nha Prisca... E também qués guarda d'carvon d'lantcha, ma d'quintalona d'Cumpainha Nacional e Millers, q'fecá na storia, moda Nhô Barone q'tava pô ques gente pedra e Damonse, guarda daques lantcha fundiode perte d'praia q'qônde el tava panhá um intchide sé soque d'carvon, el tava grital : - BÔ NÑTEM BOTE ???? ANTON MAR É Q'É BÔ BOTE

Tempe d'crise bem ta tchegá... Cabá carvon, carvon ca tem num terra daquél q'nem arve ca tinha pa fazé lenha, qué quel poque d'tarrafe q'tinha lá pa Rebera d'Vinha, ma Cumpainha d'Óleo fui tude quebrode pa fazé lenha pa cendé lume d'fagon d'três pedra d'pobreza.

Anton, Sr.Bruno, Cesar, Tchàtchà, Aimonca, tude és homes d´sés grogue, q'ganhá sempre sés vida (catá-assá) sô na roçega... És bem tmá fé num zona d'Baìa, cma tude vêz q'es tava ta sebi raston d'roçega tava ta bem sempre tchéu carvon, q'es era ubrigôde ptá na mar, pás pudia panháss sés buze limpe.

Um dia, na méi daquel falta d'carvon q'terra já tava stode ta sinti, Bruno tive um ideia, na méi d'sé quebra, d'ba spiá Mayka Barronque, la na Ferraria d'Jon Fliner, na rua d'Matijim q'um bocôde d'carvon pedra (carvon-cardiff ) p'el xprimentaba na forja !?...

Lume pegá, Mayka log reagi e ba ta dzé Bruno boca fiuza ?! Qé ess cosa ta bunzim d'munde. Se bô tem mas, bô ba bescá, qé Jon ta feca ta comprobe tude el pa nôs forja.

Bruno fecá caladim, sô dzé sés colega du q'el tinha fete e descubride... Assim, na dia siguinte log cidim, és rancá pa lorgue, ba roçegá antes d'Sol raiá, qonde era mei-dia, jás tava d'volta, ta rastá sés bôte carregadim carvon, denhirim quente na mon la na Ferraria.

Alviçra corré log na zona, mode Aimonca, q'dôs coque na butche ca sabia gordá segrêde... Da là, tude quem pude rancá ta panhá quel carvon, depusitode um data d'ône na funde d'mar d'Baìa pa vendé... Séi na el, inda mas q'el era d'graça.

Organizaçon na sqêma pa panhá quel carvon na funde d'mar nñera cosa fácil qué tude tinha q'obedêçé a um ritual sincronizode moda um orquesta, q'aqués bote, também special, q'aquel aberta pa trâz, fete p'aquel buldônhe d'Jon Papim... Tinha d'controlôde, maré ma vente d'viraçon dentre d'Baìa, mode currente na funde d'nar tava isdá tchéu, na hora d'roçega...

Ess descuberta dá lugar a um comerce na zona q'durá um data d'ône, pa sustente d'inergia na terra, pa bolse e pa barriga d'tude um povo. Era sô viste, tude quél muvimente q'rancá dess descuberta d'Bruno ma Barronque. Fui fabricôde mas raston, pa roçega...

Nho Liz Badiu, Nho Henrique, Nho Fièle, ma mas uns rapazim aprendiz muntá um comerce d'corda, la driba, na rua d'Muralha, là na Monte, ma na Praia d'Bote, ôndé q'es tava passá dia, inter ta fazé corda, desfiode d'carrapàte pa vendé.

Ess situaçon d'bescá recurse na méi d Baìa sirvi mas um vez pa provà cma verdiano é um pov q'ca ta inrascà, graças a sé Intligência q'é Universal... Roçegador fui um home valente d'nôs terra, mestre d'um profisson q'nñera tude gente na zona q'sabia, nem tava podé fazel... Qué, tude quel muvimente tinha sés regra, ma sés criter, sempre pa ruspeitá.

Roçegador d'Baìa d'Porto Grande d'Mindelo fazé sé bom trabôie, dá sé força produtiva na nôs Suciadade, nem sempre recunhicide, nem pagode, moda divia ser...

Ma graças a bô Roçegador, Pov d'Soncente pude cendé sés fagon durante tchéu tempe, pa pô quel panela d'mîdje, d'tude dia na lume ! E um cosa é certe, nunca Pov d'Soncente, sem sabé, fecá ta devé tonte a tão poque valente moda bzôte !!!


Zizim Figuera ( José Figueira, junior)

V  o  l  t  a  r